miércoles, 29 de abril de 2026
As áreas da metafísica e a cultura popular centran as dúas últimas sesións do ciclo Laboratorio de Pensamento Breve da Cidade da Cultura, que pecha as súas portas da man de dous recoñecidos profesores: Ignacio Castro e Joxerra Garzía. Coas súas reflexións ponse o punto e final a seis xornadas nas que o valor da brevidade foi examinado dende diversas ópticas dende a arte á literatura, pasando pola neurociencia e a socioloxía- e os máis variados formatos: dende os máis clásicos como o poema ou o aforismo ata os máis novidosos como o eslogan ou o tweet.
O relatorio A lentitude fulminante. De Lao Zi a Nietzsche abriu o Laboratorio da man de Ignacio Castro Rey, doutor en filosofía, ensaísta, crítico e profesor. O sábado 26 de novembro ás 12:00 horas será a quenda de Joxerra Garzía e as súas Pílulas de sabedoría popular: do refrán ao tweet. Como nas anteriores sesións, o relatorio virá seguido dun coloquio aberto a todos os asistentes e un obradoiro onde se explorará a potencia dos formatos breves como ferramenta para a transmisión de saberes e no que se exercitarán as destrezas na elaboración de aforismos. Todos eles poden consultarse na web www.cidadedacultura.org e en www.facebook.com/cidadedaculturadegalicia, xunto coas aportacións feitas polo público xeral a través das redes sociais. As prazas para participar nesta actividade xa están cubertas.
Diarios Sonoros
A Cidade da Cultura de Galicia convértese nun instrumento musical a través dunha intervención sonora e visual coa que explorar a relación entre arquitectura e música. Esta é a proposta da segunda sesión do ciclo Diarios Sonoros, que se celebrará mañá sábado a partir das 12:00 horas.
Creada ex profeso para este espazo, a sesión Arquitectura e Música contará cunha intervención sonora e visual na que os intérpretes empregarán elementos pouco frecuentes na música como pranchas de metal ou pelotas de tenis de mesa e valeranse de elementos arquitectónicos como columnas ou baldosas, para compoñer unha obra musical única, onde os artistas utilizan o edificio da Biblioteca de Galicia como emisor e receptor dos sons. A instalación audiovisual, pola súa banda, destacará elementos significativos da arquitectura de Peter Eisenman e do urbanismo compostelán por medio da xeración de imaxes e ruídos destes lugares.
Previamente á intervención artística hai unha charla na que os artistas convidados e responsables da intervención como a catedrática de música na Universidade de Santiago de Compostela e directora do Grupo de Creación Musical da USC, Inmaculada Cárdenas, a arquitecta, Cristina Palmese, e o ecólogo e compositor, José Luis Carles, contextualizarán as relacións entre a arquitectura e música, entre o espazo e o son.
A asistencia á sesión Arquitectura e Música é de balde mais é preciso reservar previamente en www.cidadedacultura.org. Ademais, ao finalizar a sesión, o artista Pablo Giráldez O Pastor retratará cunha cámara antiga o público que o desexe xunto cos artistas convidados nun espazo escénico creado para a ocasión. As fotografías serán subidas a www.facebook.com/cidadedaculturadegalicia, onde os interesados poderán descargalas gratuitamente.
Foron presentadas as xornadas Galicia Biodays, que buscan posicionar Galicia como un territorio de referencia en innovación biotecnolóxica no ámbito internacional. Este evento vaise celebrar os días 6 e 7 de maio no Auditorio Mar de Vigo, e permitirá reforzar a marca Galicia Calidade en biotecnoloxía, fomentar o intercambio de coñecemento e establecer novas colaboracións científicas, empresariais e institucionais. Está previsto que asistan máis de 1000 persoas de 9 biorrexións convidadas, con máis de 130 relatores.
Alfonso Rueda informou de que o Consello deu conta do inicio da tramitación do anteproxecto da que será 'a primeira Lei do terceiro sector da acción social de Galicia'. Unha norma que busca 'unificar nun único texto legal a regulación deste eido e recoñecer de xeito formal o seu traballo e o papel que xogan as entidades na sociedade galega'. A necesidade de aprobar esta lei xustifícase na importante presenza destas entidades en Galicia, preto de 1.500, -que constitúen 'unha auténtica rede de solidariedade', segundo resaltou a conselleira de Política Social e Igualdade, Fabiola García-, para apoiar as persoas e fogares máis vulnerables.
