Notas de prensa

A Egap acolle do 28 ao 30 de setembro un encontro sobre a xestión dos recursos ambientais en Galicia organizado por Sogama

A xestión dos recursos ambientais en Galicia centrará o Encontro que acollerá a Escola Galega de Administración Pública (EGAP), en Santiago de Compostela, do 28 ao 30 de setembro. Promovido pola Universidade Internacional Menéndez Pelayo (UIMP), a organización do evento corre a cargo de Sogama, actuando o seu presidente, Luís Lamas, como director do mesmo.

O obxectivo desta iniciativa é dar a coñecer as potencialidades do medio ambiente galego no ámbito ecolóxico, social e económico, así como a súa contribución ao desenvolvemento sostible da nosa comunidade. Para isto contarase coa participación de estudiosos e expertos na materia, pertencentes tanto á administración como á universidade e empresas do sector.

EXPERTOS DE ALTO NIVEL

Neste sentido, cabería destacar a intervención do Director Executivo do Observatorio da Sostibilidade en España, Luis M. Jiménez, quen falará da sostibilidade no noso país e no marco europeo, definindo con precisión o seu alcance, factores que inflúen na mesma e obxectivos cara aos cales debe avanzar. Así mesmo, o Director Xeral de Conservación da Natureza da Consellería de Medio Rural, Ricardo García Borregón, abordará distintas cuestións asociadas á protección e coidado do medio natural, e a Subdirectora Xeral de Produción e Consumo Sostibles do Ministerio de Medio Ambiente e Medio Rural e Mariño, Ana Rodríguez Cruz, profundizará nas máximas que lideran a nova Lei Estatal de Xestión de Residuos e as súas implicacións para as institucións, o tecido empresarial e a cidadanía de a pé.

A educación ambiental tamén ocupará un destacado lugar, toda vez que o profesor de Psicoloxía Social e Ambiental na Universidade da Coruña, Ricardo García Mira, insistirá na súa importancia vital para o modelo de desenvolvemento cara ao que debemos avanzar e onde a concienciación e sensibilización ambiental da poboación constituirá o eixe das distintas actuacións a levar a cabo.

A xestión dos residuos urbanos centrará en gran medida os contidos da segunda xornada, día 29, onde a Subdirectora Xeral de Coordinación Ambiental da Xunta de Galicia, María José Echevarría, exporá os aspectos máis relevantes do Plan autonómico definido para o período 2010-2020, cuxos principais retos pasan por reducir a produción de residuos nun 10 por cento e incrementar as taxas de reutilización e reciclaxe ata alcanzar o 30 por cento (fronte ao 10 por cento anual). Todo isto traducirase nunha diminución das cantidades de residuos a eliminar a través de vertedoiro, desviando a este tan só as fraccións que non poidan ser obxecto de valorización. Con tal motivo, o plan contempla a construción de novas infraestruturas industriais que, ademais de aliviar a presión sobre Sogama, cuxas instalacións centrais se atopan sobresaturadas, permitirán aplicar o principio de proximidade, é dicir, que os refugallos se traten preto dos lugares de xeración, minimizando as emisións de CO2 derivadas do transporte, de especial transcendencia nunha comunidade con gran dispersión de poboación.

Acto seguido, o profesor de Enxeñaría Química e Director da Oficina de Medio Ambiente da Universidade da Coruña, Manuel Soto, falará da compostaxe a pequena escala, incidindo fundamentalmente na compostaxe doméstica e o proxecto que, desde hai meses, a UDC está levando a cabo en colaboración con Sogama ao transformar en compost a materia orgánica producida nos comedores da Escola Superior de Arquitectura e a Facultade de Filoloxía, ambos centros emprazados no Campus da Zapateira.

Xa pola tarde, o grupo trasladarase ao Complexo Medioambiental de Sogama en Cerceda, onde o seu presidente presentaralles o cometido desta entidade pública, que xestiona a día de hoxe o lixo producido por 296 concellos, atendendo a máis 2.316.000 habitantes, o que vén a representar en torno ao 82 por cento dos desperdicios producidos en Galicia.

O CONSELLEIRO DE MEDIO AMBIENTE PECHA O EVENTO

Tendo en conta o escenario de crise enerxética no que nos atopamos inmersos, a enerxía cobrará especial relevancia o último día, contando co xefe da área de enerxías renovables do Instituto Enerxético de Galicia (INEGA), Nicolás Vázquez, quen se encargará de dar a coñecer os desafíos actuais no ámbito enerxético, así como asperspectivas de futuro das enerxías renovables e os combustibles alternativos.

E dado que o I+D+i constitúe un dos alicerces sobre os que debe pivotar o desenvolvemento económico dun país, o presidente da Plataforma Tecnolóxica Galega de Medio Ambiente (ENVITE), Enrique Valero, á súa vez Director da Escola de Forestais da Universidade de Vigo, amosará a situación e posibilidades do I+D+i ambiental para as compañías do sector.

O Conselleiro de Medio Ambiente, Territorio e Infraestruturas, Agustín Hernández, será o encargadp de poñer fin ao curso cun acto de clausura no que tamén participará o Director da UIMP en Galicia, Xosé Luís Barreiro.