Notas de prensa

O Foro E. Peinador celebra un novo encontro empresarial

Os participantes no debate coñeceron os avances no proceso aberto de incorporar a lingua galega ás actividades empresariais. Foron informados polo Presidente do Foro das adhesións de novas empresas e da galeguización da etiquetaxe de varias marcas comerciais que se unen a outras que xa se comercializan. O sector vinícola é, con moita diferenza, o máis galeguizado, cifrándose nun 47% as adegas que etiquetan os seus envases en galego.

DEREITOS LINGÚÍSTICOS DOS TRABALLADORES, CONSUMIDORES E USUARIOS.-

A estratexia do Foro E. Peinador para o próximo ano centrarase na difusión dos dereitos lingüísticos dos consumidores e usuarios, e dos traballadores na negociación colectiva. A tal fin preparase un acto conmemorativo dos vinte anos de aprobación polo pleno do Consello Galego de Relacións Laborais da cláusula dos dereitos lingüísticos no texto dos convenios colectivos en colaboración con dito Consello.

CURSO DE FORMACIÓN PARA CADROS DIRECTIVOS.-

Unha boa parte do debate dedicouse a estudar iniciativas para incorporar aos traballadores e cargos xerenciais ao proceso de galeguización das empresas, para acadar este fin o próximo ano celebrarase un curso formativo baixo o rubro “Xestionar a economía e as singularidades da identidade” coa participación das tres universidades, con invitación expresa ao Instituto Tecnolóxico Empresarial e a Escola de Negocios de Novacaixagalicia.

RECOÑECEMENTO PÚBLICO E DISTINCIÓNS Á EXCELENCIA.-

Os participantes no debate consideran fundamental artellar o deseño dunha pedagoxía que contribúa a combater os prexuízos lingüísticos. A historia de Galicia conta con exemplos de empresarios con éxito nos negocios e unha inequívoca identificación dos seus negocios coa cultura e lingua galega. Isidro Parga Pondal, investigador e empresario de minas; Ramón Obella Vidal, médico e fundador da empresa farmacéutica Zeltia ou Enrique Peinador Lines, propietario das Augas e Balneario de Mondariz, son algúns deses exemplos senlleiros. Todos os tres porán os seus nomes ás distincións que recoñecerán á excelencia na investigación e a imaxe corporativa ás actividades que poñen o acento nos nosos sinais de identidade.

RECUPERAR A MEMORIA DE ISIDRO PARGA PONDAL.-

Acordouse, seguindo o labor principiado polo Foro E. Peinador con outros empresarios, de recuperar a memoria do investigador e empresario Isidro Parga Pondal coa edición dun estudo elaborado polo profesor Ricardo Gurriarán. As tres Universidades Galegas participarán de maneira especial nesta homenaxe coa participación do Laboratorio Xeolóxico de Laxe creado por Parga Pondal.

DIFUSIÓN DO DISCURSO DA GALEGUIDADE EMPRESARIAL.-

O Foro E. Peinador ten previsto celebrar en varios polígonos industriais e no Parque Tecnolóxico de Galicia, en Ourense, actos para difundir o discurso da galeguidade empresarial.

O FORO E. PEINADOR E AS NOVAS TECNOLOXÍAS.-

O Foro E. Peinador está a difundir as súas actividades a través das redes sociais (facebook e youtube) na súa web www.galeguizargalicia.com e na súa canle de televisión por internet www.galeguizargalicia.tv . En todas estas plataformas dán a coñecer as súas iniciativas e campañas de sensibilización co idioma, dun xeito imaxinativo e con contido pedagóxico.

PARTIPANTES NO ENCONTRO CELEBRADO.-

1. Xosé González Martínez, Presidente do Foro E.Peinador
2. Carlos Varela García, Fiscal Superior de Galicia
3. Juan Casares Long, Reitor da Universidade de Santiago de Compostela
4. Salustiano Mato de la Iglesia, Reitor da Universidade de Vigo
5. Xosé María Barja Pérez, Reitor da Universidade da Coruña
6. Anxo Lorenzo Suárez, Secretario Xeral de Política Lingüística
7. Demetrio Fernández López, Presidente Consello Galego de Relacións Laborais
8. Luís M. García Mañá, Xefe Superior de Policía de Galicia
9. Xosé Domínguez, director financieiro de Factorias Vulcano
10. Fernando Alcalde, Presidente do Clúster do Naval, ACLUNAGA
11. Francisco González, director-xerente do Grupo Lantero
12. Casián García, director-xerente de “Celtic Estores”
13. Manuel Pozo, directivo de “Egatel”
14. Xerardo García Albela, director xeral de “Itelsis”
15. Xosé Manuel Ordoñez, directivo de “R. Telecomunicacións”
16. Xosé Turnes, director xeral de “Progando”
17. Francisco Novoa Rodríguez, director xeral de “Grupo Academia Postal”
18. Xosé L. Vázquez, director xeral do “Grupo Sargadelos”
19. Xosé Otero, director xeral “Pousadas de Compostela”.
20. Manuel Rial, director-xerente de “Seguridade A-1”
21. Ana Búa Casas, directora xeral de “Runadcat”
22. María Montse Maceiras, directora-xerente de “Granitos Maceiras”
23. Ciprián Rivas, xefe gabinete reitorado U.de Vigo