Notas de prensa

Entregados os premios aos gañadores do primeiro concurso Un mundo de cor

O secretario xeral da Emigración, Santiago Camba, entregou no Museo Pedagóxico de Galicia (Mupega) os nove premios correspondentes á primeira edición do concurso “Un mundo de cor”. No acto tamén estivo presente o subdirector xeral de Inmigración e Retorno, Antonio Aguarón.

O gañador da Primeira Categoría (alumnado de 1º a 3º de Primaria) foi Iván Vázquez, do Colexio Santiago Apóstol de Ponteareas; a vencedora da Segunda Categoría (alumnado de 4º a 6º de Primaria) foi Florencia Lago, do CEIP Apóstolo Santiago, da propia capital galega; e co premio á Terceira Categoría (alumnado da ESO) alzouse Marietu Ramos, do CPI Covaterreña de Baiona.

Na Primeira Categoría foron galardoados co segundo premio Montserrat Buján, do CEIP Ramón Cabanillas de Santiago, e co terceiro Catuxa García, do CEIP A Ramallosa de Teo. Na Segunda Categoría, obtivo o segundo premio Andrea Cuevas, do Colexio Santiago Apóstol de Ponteareas, e o terceiro Xiana Vilar, do CPI da Cruz de Nigrán. E, finalmente, na Terceira Categoría levou o segundo galardón Lara de Villalobos, do CPI Covaterreña de Baiona, e o terceiro recaeu en María Jardón, do IES Otero Pedrayo, de Ourense.

Os premios

“Un mundo de cor” é unha iniciativa da Subdirección Xeral da Inmigración e do Retorno (da Secretaría Xeral da Emigración) na que participou a Subdirección Xeral de Ordenación e Innovación Educativa e Formación do Profesorado (da Consellería de Educación e Ordenación Universitaria). O obxectivo era que o alumnado de Educación Primaria e Secundaria Obrigatoria dos centros públicos, privados ou concertados de Galicia expresase a súa visión sobre a riqueza da diversidade sociocultural presente na nosa sociedade.

Na primeira e segunda categorías, tódolos premiados recibiron un lote de libros infantís. Aparte dese lote, na primeira categoría, o primeiro premiado foi agasallado cunha caixa de pinturas con cabalete, o segundo cunha caixa de pinturas, e o terceiro cun estoxo de pinturas.

Na segunda categoría, ademais do devandito lote de libros, o primeiro premio consistiu nunha cámara fotográfica, o segundo nunha Nintendo DS co xogo Art Academy, e o terceiro un ‘mp4’.

E finalmente, na terceira categoría tamén tódolos premiados recibiron cadanseu lote de libros, neste caso xuvenís. Asemade, o primeiro galardoado fíxose cun iPad, o segundo cunha cámara fotográfica, e o terceiro cun ‘mp4’.

Variedade e calidade

Un total de 308 obras foron recibidas en prazo na Secretaría Xeral da Emigración, das cales máis da metade (174) remitíronse desde centros da provincia da Coruña, a máis participativa na experiencia. Sen embargo, a localidade con máis traballos presentados é Ourense, con 53, destacando o alto índice de participación das alumnas e a dos alumnos do I.E.S. Otero Pedrayo e mailo Colexio Cardenal Cisneros.

Das máis de trescentas obras presentadas, 119 pertencían á primeira categoría, 115 á segunda, e 74 á terceira. Remitiron traballos a Emigración rapazas e rapaces escolarizados nun total de 23 centros da Comunidade, que sorprenderon moi gratamente aos membros do xurado pola cantidade, variedade, e calidade, dos traballos presentados, superando tódalas expectativas depositadas na iniciativa.

Máis información en: http://anparamoncabanillas.wordpress.com/2011/06/14/concurso-de-debuxo-e-pintura-un-mundo-de-cor/