martes, 29 de septiembre de 2026
A campaña Libre, de fomento dunha condución segura e sen alcol entre a mocidade, desenvolverase este ano máis alá dos propios meses de verán e, así, xa terá presenza nos días de Entroido e na Semana Santa. Ademais, este ano a iniciativa contará cun tema musical propio elaborado polo grupo ribeirense Jabón Blue.
A conselleira de Traballo e Benestar, Beatriz Mato, presentou hoxe esta iniciativa nunha rolda de prensa na Sala Capitol, de Santiago de Compostela. No acto, estivo acompañada polo director xeral de Xuventude e Voluntariado, Ovidio Rodeiro; polo cantante de Jabón Blue, Javier Maneiro; e polo actor Manuel Manquiña.
O obxectivo último desta campaña, segundo precisou Mato, é alertar dos perigos de mesturar alcol e condución, especialmente coa meta de concienciar á mocidade. Precisamente pola relevancia da súa finalidade, a Xunta ampliará este ano tanto as zonas de cobertura da campaña, como os períodos durante os que estará en marcha.
Deste xeito, en 2011 a campaña vaise iniciar de inmediato, na semana previa ao Entroido, e terá continuidade na Semana Santa. Con todo, o maior despregue seguirá sendo no verán, en tanto é a época asociada cun maior tempo de ocio nocturno.
Con esta ampliación, garántese unha maior introdución da mensaxe, que terá máis continuidade no tempo. Mato lembrou que en 2010, só de xullo a setembro, foron preto de 100.000 as persoas que recibiron esta mensaxe, xa que a campaña estivo presente nas festas, romarías e concertos do verán galego. Na difusión da mesma, colaboraron tres das principais orquestras galegas.
Este ano a campaña Libre conta con outra novidade importante. O punto de partida da mesma será o tema e o videoclip do grupo de Ribeira Jabón Blue, que será o referente musical desta campaña.
En concreto, trátase do tema Flores en la carretera, que foi arranxado por Luís Cobos, e que conta coa participación do actor Manuel Manquiña. Editáranse 10.000 exemplares de CDs e DVDs con estes contidos, que se distribuirán en centros de ensino, centros universitarios, casas da xuventude, asociacións xuvenís e de voluntariado, e puntos de información xuvenil, e enviarase tamén a medios de comunicación de todo o Estado.
Así, o arranque da campaña celebrarase o xoves, 24 de febreiro, cun concerto na Sala Capitol, no que actuará Jabón Blue e que será presentado por Manuel Manquiña. O acto contará tamén con testemuñas de persoeiros que apoian esta campaña como o presentador Roberto Vilar; o actor e cómico, José Touriñán; os actores Pedro Alonso, Luis Zahera, Iolanda Castaño, e Diana Nogueira; o músico Julián Hernández; o campión de España de rallyes, Sergio Vallejo; ou o ciclista Óscar Pereiro. Ademais, no mes de marzo, haberá unha segunda actuación en Ribeira no marco desta campaña.
Meses de verán
Ademais de todas estas actuacións, o verán continuará sendo o eixo central desta campaña. Neses meses, Libre estará presente a pé de rúa nos principais puntos de ocio nocturno de Galicia e nos principais puntos de sinistralidade viaria. Este ano asinarase tamén un convenio de colaboración coa Confederación de Empresarios de Hostalería de Galicia, para acadar a implicación dos locais de ocio. Tamén continuará a presenza de monitores xuvenís que difundirán a máxima de 0 por cento alcol para conducir e que farán controis voluntarios de alcolemia.
Por outra banda, este ano ofrecerase por segunda vez o curso de formadores en mediación viaria. Na actualidade, xa hai 20 profesionais da Dirección Xeral de Xuventude e Voluntariado especializados nesta temática. Todos eles levan a campaña Móvete, que continuará este ano, e que consiste en levar a cabo obradoiros de concienciación de seguridade viaria nos campamentos de verán da Xunta.
Nesta mesma liña de actuación, continuarase apostando polos cursos de condución segura para mozos e mozas de 18 a 35 anos, que acadaron un importante éxito en 2010, edición na que ofreceron 512 prazas nos meses de outubro, novembro e decembro no circuíto da Magdalena de Forcarei. Actualmente, estase traballando para ampliar os lugares de realización desta actividade.
En definitiva, concluíu Mato, este ano a campaña Libre incrementa os períodos de cobertura da campaña, ao incluír o Entroido e a Semana Santa; intensifica a proxección da campaña ao poñerlle letra e música propia; e aposta por continuar os obradoiros nos campamentos de verán e os cursos de condución segura en máis lugares de Galicia. Para este fin, a Xunta de Galicia investirá ao redor de 100.000 euros.
A Xunta iniciou hoxe nas residencias de maiores a campaña de vacinación fronte á gripe, que incorpora a vacina reforzada desde os 65 anos e busca chegar a 926.000 persoas de máis de 60 anos. En Galicia hai 926.000 persoas de 60 ou máis anos como poboación diana para a vacinación fronte á gripe, e ao redor de 549.000 maiores de 70 anos, que é a poboación diana para a que está indicada a inmunización fronte á covid. A campaña prolongarase ata o 31 de decembro, desenvolvéndose de xeito progresivo nos distintos colectivos e grupos de idade. Así, logo do arranque de hoxe nas residencias de maiores e centros de discapacidade, o vindeiro día 13 de outubro incorporarase a vacinación infantil nos centros de saúde e nos 75 colexios.
O informe de balance do programa de axudas para a Atracción de Empresas a Galicia, unha liña xestionada pola Consellería de Economía e Industria a través do Igape que se consolida como un piar estable dentro da estratexia económica do Goberno galego, reflicte que entre os anos 2024 e 2026, este programa permitiu a concesión de 74,08 millóns de euros en subvencións públicas, unha contía que impulsou a posta en marcha de 96 proxectos empresariais e que xerará un impacto económico total de 256,75 millóns de euros en mobilización de investimento privado.
