Notas de prensa

A Deputación investiu nos últimos tres anos preto de 41 M€ na mellora da calidade e da seguridade das súas estradas

O Deputado de Infraestruturas, Manuel Martínez, presentou o mapa provincial que elaborou o Departamento provincial en colaboración co Instituto Nacional Xeográfico, dependente do Ministerio de Medio Ambiente, no que figuran todas as actuacións executadas polo actual equipo de goberno na rede viaria. En total, o organismo provincial investiu dende xullo de 2007 ó redor de 41 millóns de euros no acondicionamento das estradas súa titularidade, mellorando a súa calidade e, por tanto, a seguridade dos usuarios que circulan por elas.

Manuel Martínez subliñou que “aquí non se inclúen as do canon nin as do Plan Extraordinario, polo que se sumásemos todo o investimento sería maior. Fixémolo con racionalidade e con previsión para no ter que reparalas en alomenos 10 anos, aplicando aglomerado en quente. Estamos a falar do esforzo que fixo o departamento de Infraestruturas, un esforzo que non ten comparación nin parangón co feito nas estradas anteriormente”.

Deste xeito, a través dos diferentes plans como os de Conservación, o Plan de Obras e Servizos ou con fondos propios, melloráronse 325 quilómetros, dos que tan só 5,8% levan rego asfáltico e non aglomerado en quente, “e que se corresponden cos proxectos herdados do anterior goberno”. Pertencen a 84 estradas que benefician a 53 Concellos, “o que rebate as teorías de que só investimos en municipios do Partido Socialista, polo que esta propaganda é totalmente falsa”. Nestes momentos, da totalidade de viais acondicionados tan só falta por rematar acondicionamento de catro quilómetros da CP 3208, en Monforte.

Asimesmo, engadiu que “se miramos a estatística provincial en canto ó trafico viario, aquelas estradas que teñen unha densidade de vehículos entre 500 e 5.000 diarios, nestes momentos estarían en condicións perfectas. Nas que van entre 100 e 500, acondicionamos un terzo destes viais”.

“Fronte a un goberno que traballa, coa Xunta todo son problemas”

O responsable de Infraestruturas sinalou que por primeira vez a Deputación actúa en todos os municipios da provincia, con independencia da súa cor política. “Fronte a esta actuación dun goberno que traballa e trata de mellorar as comunicacións na provincia, está un goberno na Xunta co que, nestes momentos, todos son problemas e restricións presupostarias; todo o contrario do que está a facer a Deputación. Todas as administracións estamos sufrindo os recortes, pero isto non pode ser unha excusa”. O ritmo de traballo é tal que hoxe a de Lugo é a Deputación que máis expropia de Galicia e foi quen de afrontar por primeira vez na historia desta institución un plan se sinalización da rede viaria provincial, dotado con 2,2 millóns de euros.

Asimesmo, lembrou que o actual equipo de goberno reorientou as funcións do Parque Móbil, que estaba totalmente deslabazado, e hoxe en día non só presta un servizo esencial ós Concellos senón que lles aforra cartos na mellora das súas vías municipais. Un exemplo desta colaboración é o dispositivo despregado para arranxar os danos producidos polas riadas na Mariña no mes de xuño.

Máis aglomerado e máis quilómetros

A Deputación continuará en 2011 mellorando a rede viaria provincial con outro plan de aglomerado en quente, dentro da partida económica destinada á Conservación Integral da mesma. O Deputado de Infraestruturas anunciou que se acondicionarán 172 quilómetros correspondentes a viais de 36 Concellos: Viveiro, Cervo, Ourol, Xermade, O Valadouro, Foz, Alfoz, Mondoñedo, Pastoriza, Pontenova, Pol, Castro de Rei, Lugo, Castroverde, Corgo, Láncara, Baralla, Guitiriz, Friol, Monterroso, Portomarín, A Fonsagrada, Navia de Suarna, Becerreá, Cervantes, Pedrafita, Triacastela, Samos, Quiroga, Ribas de Sil, Pobra de Brollón, Monforte, Pantón, Saviñao, Taboada e Chantada.

Resposta urxente da Xunta

Este xoves técnicos da Deputación reuniranse en Santiago de Compostela cos da Xunta de Galicia para intentar chegar a unha solución para a Ponte de Arante, en Ribadeo, que quedou parcialmente destruida polas inundacións que afectaron considerablemente á Mariña no mes de xuño. Martínez indicou que por parte do organismo provincial existiu dende o primeiro momento unha total predisposición para solucionar o problema, proba diso é que se habilitou unha partida económica de urxencia para iniciar os traballos de reparación canto antes, “pero non podemos dicir o mesmo do goberno autonómico”.

No mes de agosto, a Xunta remitiu un informe no que se expresaba que non concedía a autorización á Deputación para demoler o viaduto e construir un novo, recomendando que se conservase a estrutura de fábrica. “Ante esta situación, no mes de setembro, solicitámoslle que se realizase unha nova proposta, que nunca recibimos na Deputación”.

O Deputado tamén denunciou a situación da capela de Acebedo, en Navia de Suarna. O seu estado ruinoso obrigou a cortar a estrada provincial, xa que corre un grande risco de derrubarse, o que pode traer consecuencias maiores e que na Deputación se queren evitar por todos os medios. Por este motivo, en setembro remitiuse a Patrimonio e ó Obispado de Lugo sendos escritos nos que lles pide unha resolución urxente. “A entidade eclesiástica concedeu a autorización, pero da Xunta seguimos se obter resposta. Agardamos que na xuntanza de mañá se aclaren estas dúas cuestións”, concluiu o Deputado provincial.