martes, 29 de septiembre de 2026
O director territorial de Telefónica en Galicia e Asturias, Ignacio Aller, e o secretario xeral de Política Lingüística, Anxo Lorenzo, manifestaron en Santiago a súa vontade de seguir explorando novas accións que contribúan a promover o uso da lingua galega nos servizos que ofrece a compañía de telecomunicacións.
O secretario xeral e o director territorial, acompañados do xefe de Recursos Humanos de Telefónica en Galicia, Luis Enrique Vázquez, fixeron hoxe estas declaracións durante a presentación do proxecto Glosa, unha plataforma de formación en liña desenvolvida pola compañía a través da que todos os seus empregados máis de 200.000 persoas en 23 países terán a posibilidade de aprender galego, entre outras moitas accións de promoción do idioma.
Segundo manifestou Ignacio Aller, Glossa é un exemplo máis do compromiso de Telefónica con Galicia e co seu idioma, e comprometeuse a seguir traballando coa Consellería de Educación e Ordenación Universitaria a través de Política Lingüística na identificación de posibles accións de promoción do uso do galego. Esta vontade de cooperación traducirase na sinatura dun convenio entre ambas as entidades para promover o uso do galego nos servizos que ofrece a compañía de telecomunicacións, segundo informou Anxo Lorenzo.
Durante a súa intervención, o secretario xeral tamén fixo fincapé na necesidade de impulsar a oferta formativa para mellorar a competencia en lingua galega da sociedade. Así mesmo, Anxo Lorenzo incidiu na importancia de colaborar coas empresas operadoras para que lle ofrezan os seus servizos á cidadanía en galego, así como na necesidade de conectar a lingua galega aos avances que se producen nas novas tecnoloxías, por tratarse dunha estratexia clave para garantir o futuro do idioma e a vixencia da utilidade do galego.
O proxecto Glossa
Os cursos do proxecto Glossa arrancan desde o nivel A1 ata o A2 do Marco común europeo de referencia para as línguas, e inclúen leccións organizadas por seccións e multitude de actividades e contidos (audios, vídeos, exercicios
) que rematan cunha unidade final de revisión e consolidación. Ademais, o director territorial de Telefónica lembrou que a compañía xa dispón de distintos servizos en galego, como facturas e atención ao cliente, e ademais foi a primeira en negociar cos grandes fabricantes para que os galegos que o quixesen puidesen dipoñer de terminais con menús no seu idioma. Na actualidade, Telefónica oferta máis de 100 terminais con menú en galego e a maioría delas inclúe tamén dicionario.
Telefónica en Galicia: máis de 5.000 empregos e 1.000 millóns de investimento
O acto de presentación do proxecto Glossa serviu, ademais, para reafirmar por parte do director territorial de Telefónica a galeguidade da compañía, que emprega directamente en Galicia 2.758 persoas, ás que se suman os 2.570 empregos indirectos de empresas que traballan en exclusiva para a compañía. En total, os empregos de Telefónica en Galicia, que desde 2005 investiu máis de 1.000 millóns de euros no territorio, supoñen o 26% de todo o emprego TIC galego. Esta actividade achega 15 millóns de euros en impostos autonómicos e supón por si soa o 1,7% do PIB galego.
A Xunta iniciou hoxe nas residencias de maiores a campaña de vacinación fronte á gripe, que incorpora a vacina reforzada desde os 65 anos e busca chegar a 926.000 persoas de máis de 60 anos. En Galicia hai 926.000 persoas de 60 ou máis anos como poboación diana para a vacinación fronte á gripe, e ao redor de 549.000 maiores de 70 anos, que é a poboación diana para a que está indicada a inmunización fronte á covid. A campaña prolongarase ata o 31 de decembro, desenvolvéndose de xeito progresivo nos distintos colectivos e grupos de idade. Así, logo do arranque de hoxe nas residencias de maiores e centros de discapacidade, o vindeiro día 13 de outubro incorporarase a vacinación infantil nos centros de saúde e nos 75 colexios.
O informe de balance do programa de axudas para a Atracción de Empresas a Galicia, unha liña xestionada pola Consellería de Economía e Industria a través do Igape que se consolida como un piar estable dentro da estratexia económica do Goberno galego, reflicte que entre os anos 2024 e 2026, este programa permitiu a concesión de 74,08 millóns de euros en subvencións públicas, unha contía que impulsou a posta en marcha de 96 proxectos empresariais e que xerará un impacto económico total de 256,75 millóns de euros en mobilización de investimento privado.
