Notas de prensa

O Concello de Ferrol abre a organización das festas á participación cidadá

O Concello de Ferrol dá un paso máis na participación cidadá, unha das claves da política do actual goberno local e instrumento fundamental para levar a cabo calquer iniciativa con visos de éxito entre a cidadanía. E faino no eido das festas. Ao respecto, a edil do ramo, Beatriz Sestayo, anunciaba esta mañá, recén concluidos os festexos navideños e en carteira os de Entroido, que o Concello quere facer unhas festas a medida dos gustos e preferencias dos veciños e veciñas. E, para iso, vén de pór en marcha un novo canle de comunicación: o enderezo electrónico: concertos@ferrol.es, no que os ferroláns e ferrolás poderán remitir as súas propostas para o calendario de actividades das festas. Aínda que o nome incide especialmente no apartado musical, Beatriz Sestayo explicou que o seu departamento non quere limitar a participación cidadá a este aspecto. En todo caso e para un acceso áxil e rápido, a páxina web municipal (www.ferrol.es) dispón dende hoxe dun apartado específico con conexión directa ao dito correo electrónico.

Nesta liña, a concelleira de Festas, Benestar Social, Xuventude e Solidaridade indicou que esta nova ferramenta permitirá mellorar non só as festas do verán, senón tamén as do Nadal e Entroido, así como outras citas destacadas no calendario como a Feira da Ilustración.

Así mesmo, e co obxecto de dotar da maior transparencia posible a acción neste campo, Beatriz Sestayo indicou que o seu departamento colgará na web municipal www.ferrol.es un ránking coas principais preferencias dos cidadáns. Un ránking que se acompañará dos cachés dos profesionais, no caso dos concertos, e tamén das peticións plantexadas e dos seus custes. En todo caso, Sestayo indicou que o Concello confía en que os veciños e veciñas darán traslado daquelas propostas que, dende o punto de vista económico, sexan asumibles para a Administración local. E, nesta liña, engadiu que periodicamente a Concellería de Festas irá colgando tamén información co orzamento para a organización destes festexos, das xestións realizadas e en que se inviste.

Ao respecto, Beatriz Sestayo quixo pór en valor e agradecer especialmente a colaboración da cidadanía nas pasadas festas de Nadal, que o seu departamento organizou no prazo dun mes. Asegurou nesta liña que a concellería tentou na medida do posible atender as peticións e suxerencias plantexadas, así como que esa actitude se viu reflectida nunha maior presenza cidadá nas rúas da cidade.

Por último, Beatriz Sestayo animou a todos e a todas a participar desta iniciativa e confiou en que contribuirá de xeito decisivo a mellorar as festas de Ferrol, satisfacendo aos seus veciños e veciñas e atraendo a máis xente de fóra da cidade.