Notas de prensa

Dez mozos de Pontevedra, Ourense e A Coruña amosan os seus deseños en Tesoira 08

O director xeral de Xuventude e Solidariedade, Rubén Cela, e o delegado provincial da Vicepresidencia da Igualdade e do Benestar, Francisco Xabier Verea Argibay, presentaron a décimo sétima edición do Certame Galego de Creadores Novos de Moda Tesoira 2008 nun acto celebrado en Vigo no que tamén estiveron presentes os dez finalistas do evento. Os mozos exhibirán os seus deseños na gala que se celebrará o xoves, 20 de novembro, no Teatro Caixanova a partir das 20 horas.

Os finalistas desta edición son: Eva Soto Conde, de Cambados, coa colección ‘A arte da papiroflexia’; Mónica Bastón Paz, de Sanxenxo e residente en Pontevedra, con ‘A mente demente de Sévérine Sérizy’; Isabel Mastache Martínez, de Vigo, con ‘Sputnik’; Olalla Novoa Seisdedos, de Vigo, con ‘Pocket’; Rocío Caramés Castro, de Verín e residente en Vigo, con ‘Impresiones’; Alberto Neves Gómez, de Vigo, con ‘Compresión-Explosión’; Paula Lages Gamarra, de Vilagarcía, con ‘We can do it!’; Marcos Barra Rodríguez, de Baiona, con ‘Beuys(Génesis)’; Laura Ponce Mouriño, de Ourense e residente en Allariz, por ‘Fío a Fío’, e mais Alba Vázquez de las Heras, da Coruña, coa colección ‘Nómade’. Os deseñadores expuxeron na presentación o título das súas coleccións, que se inspiran en cuestións tan diversas coma o cine, a pintura, a papiroflexia ou a Segunda Guerra Mundial.

O delegado da Vicepresidencia da Xunta explicou que os dez finalistas foron escollidos polo prestixioso xurado integrado polos deseñadores Cristóbal Vidal, Pilar Bande, María Mariño e Jorge Méndez Galiñanes, e polos responsables académicos Guillermo Gómez Espinosa, Dolores Dopico e María del Mar Ciorraga Souto. Desta decena de coleccións seleccionadas premiaranse tres, con galardóns de 3.000, 1.500 e 1.000 euros, ademais de cadansúa bolsa de formación na industria téxtil por contías de 3.000 euros que os mozos creadores desenvolveran xunto a Cristóbal Vidal, Pilar Bande e María Mariño. Francisco Xabier Verea lembrou que “unha das liñas de traballo fundamentais da Dirección Xeral de Xuventude e Solidariedade é poñer en marcha canles para que a xente nova poida trasladar a súa creatividade e poñela en coñecemento do conxunto da sociedade”. Deste xeito, o certame ‘Tesoira’ “está integrado xunto con outras modalidades artísticas no programa GZcrea”, no que segundo precisou a continuación Rubén Cela participaron este ano máis de 400 mozos e mozas artistas.

O director xeral definiu o ‘Tesoira’ coma un evento, “radicalmente consolidado”, pois “poucos certames poden ter ás súas costas 17 anos de vida e poucos poden falar dunha participación tan ampla nun sector tan complexo como é o da moda, onde seguimos batendo cifras aumentando un 25% a concorrencia con respecto ó ano pasado”, xa que nesta edición se rexistraron 39 participantes.

Cela apuntou “os dous piares que nos levan a seguir apostando por un evento coma o ‘Tesoira’ e facelo con máis ilusión e máis orgullo cada ano”. Por unha banda, “que sexa un punto de encontro entre o sector empresarial do mundo da moda e as novas promesas do panorama galego”, e neste senso lembrou que participantes en edicións anteriores do ‘Tesoira’ “son hoxe deseñadores de alto prestixio a nível europeo”. En segundo lugar, amosou o seu convecemento de que “no actual proceso de recesión económica, o téxtil é un sector importantísimo para a economía galega, e dentro deste é fundamental seguir a potenciar algo no que os galegos sempre seremos competitivos: a nosa capacidade creativa e de formar bos profesionais que poidan competir en calquera parte do mundo cos seus deseños”. Neste senso, o goberno galego seguirá “apostando por que nas vindeiras décadas a moda galega siga ocupando un espazo importante e privilexiado non só nas pasarelas de moda senón tamén nos establecementos comerciais”.

Tanto o director xeral de Xuventude e Solidariedade coma o delegado provincial da Vicepresidencia da Igualdade e do Benestar agradeceron a colaboración da Consellería de Innovación e Industria e mais da Consellería de Cultura e Deporte no Certame Galego de Creadores Novos de Moda ‘Tesoira 2008’, así coma o apoio de Caixanova, El Corte Inglés e a Televisión de Galicia, que retransmitirá a gala final.

Exposición en El Corte Inglés

O director de Relacións Externas de El Corte Inglés en Galicia, Pati Blanco, anunciou durante a presentación dos finalistas que as coleccións dos tres primeiros clasificados no ‘Tesoira 2008’ se exhibirán nos centros que a firma ten na Comunidade “para que o gran público poida disfrutar de xeito directo destes traballos, que compartirán espazo tamén coa moda tradicional”. Blanco expresou o respaldo de El Corte Inglés ao ‘Tesoira’, no afán de “promocionar un dos sinais de identidade non soamente da nosa imaxe como país senón tamén da nosa propia economía, como é o mundo da moda”, no que “hai unha canteira moi frutífera”.