Notas de prensa

O reitor reclama un plan de financiamento no acto de apertura do curso na USC

A USC corre “un moi serio risco de entrar nun período de estanflación de graves consecuencias para o noso país”, comezou advertindo o reitor Senén Barro no seu discurso de apertura do curso académico 2008-09 na USC pronunciado no Paraninfo da Universidade. Mentres hai quen fala dunha nova etapa económica de estanflación, argumentou, a inflación académica é “notoria” tanto na actividade docente como investigadora. Mais ter que desempeñalas “con crecementos económicos mínimos, cando non nulos, ou incluso negativos”, supón pór “en solfa” o crecemento e a competencia das universidades.

Barro lembrou que o Sistema Universitario Galego, e singularmente a USC, perdeu na última década máis de vinte puntos porcentuais en relación co peso relativo ao financiamento medio do Sistema Universitario Español. Neste contexto, e subliñando que a USC se sitúa como a sétima Universidade de todo o Estado no que se refire a produtividade en investigación, “na medida en que se nos esixe maior calidade, a nosa capacidade global diminuirá se os recursos económicos non aumentan de modo importante, xa que o resto das principais variables que interveñen no proceso dificilmente poden aumentar”, indicou.

Todo isto, e diante do recente anuncio do presidente da Xunta de Galicia de que non haberá un novo plan de financiamento das Universidades para 2009, situou a Senén Barro “na obriga” de advertirlle “ao noso goberno e ao conxunto da sociedade que non podemos seguir así”. “Estamos estragando o mellor que temos”, engadiu. “A autonomía universitaria está sometida a condicionantes de importancia, e o do financiamento é, de lonxe, o máis relevante”.

Rematou o reitor cualificando de “moi grave” a situación. A USC leva anos “de recortes, de penuria, que pasan e pasarán factura á nosa capacidade de servir á sociedade galega e de proxectala no mundo”. Este é, rematou dicindo, “realmente o problema e o noso desacougo, e debería selo para toda a sociedade galega, que pode chegar a ver como se apaga o principal motor de impulso desa sociedade do coñecemento”.

Memoria do curso 07-08

A secretaria xeral Isabel García-Rodeja interveu neste acto inaugural presentando a memoria do acontecido na USC durante o pasado curso académico. Entre os datos subliñados, García-Rodeja destacou que a USC está a consolidarse como a universidade galega máis demandada, xa que 31.780 estudantes pasaron polas aulas da institución académica compostelá.

A presentación incluíu datos relativos á comunidade universitaria; ás honras e distincións; á actividade dos órganos de goberno; á oferta, xestión e mellora da calidade académica; á proxección da USC; actividades nos centros; servizos, axuda social e actividade cultural; e á economía e financiamento.

Lección maxistral

A olfacción secundaria nos mamíferos foi o tema elixido polo catedrático de Anatomía e Produción Animal, Ignacio Salazar Beloqui, para impartir a lección maxistral deste curso. Nela destacou a importancia dos sentidos, entre os que incluíu o olfato, por ser sistemas especializados que se encargan de manter en permanente contacto aos seres vivos co exterior ao tempo que informan igualmente do que ocorre no propio medio interno.

Neste contexto, o profesor Salazar explicou que, fronte ao resto dos sentidos, o olfato está dotado de receptores de distinta natureza localizados en diferentes lugares, o que explica que na maioría dos mamíferos existan dous sistemas olfativos, o principal e o secundario, centrando a súa intervencións en analizar polo miúdo este último.