jueves, 23 de abril de 2026
Investigadores de Química Orgánica, Bioloxía e Medicina da
USC, dirixidos polo doutor Eugenio Vázquez e o catedrático José Luis
Mascareñas, desenvolveron un sensor molecular para detectar as
ciclinas A, proteínas que aparecen altamente concentradas en moitos cancros. Mascareñas indica que na actualidade existe un grande interese na elaboración de métodos de detección e localización de marcadores tumorais que permitirían o diagnóstico temperá da enfermidade.
O sensor é unha estratexia química que emite luz (fluorescencia)
soamente cando se une á devandita proteína, pero non o fai coas outras no medio celular, sinalizando así a presenza concentrada de ciclinas A.
Aínda que é cedo para falar sobre a súa aplicación en ensaios
clínicos, os investigadores advirten da súa posible relevancia
práctica. Isto levou ao equipo a protexer o descubrimento cunha
patente xa que, ademais do interese en relación coa posibilidade de
detectar as ciclinas, o método pode facilitar a creación de novos
fármacos que actúen como inhibidores da actividades desta proteína
directamente implicada na regulación dos procesos de proliferación
celular.
O equipo de investigación
O catedrático destaca que o éxito do proxecto constitúe un exemplo claro do valor engadido de traballo interdisciplinario entre grupos con capacidades e experiencias complementarias, neste caso entre un equipo de química e un de bioloxía celular.
O traballo levouse a cabo co apoio do profesor Anxo Vidal, do
Departamento de Fisioloxía da USC, e coa participación da doutoranda do Departamento de Química Orgánica, Elena Pazos, responsable directa da construción experimental do sensor molecular. Tamén destacou a colaboración do profesor Luis Castedo.
Os resultados do estudo publicaranse nunha das revistas internacionais máis prestixiosas do eido químico, o Journal of the American Chemical Society. Resumindo a importancia da investigación, Mascareñas subliña que se trata fundamentalmente dun traballo de ciencia básica, dirixido a xeración de coñecemento e novos conceptos, pero con posibles repercusións prácticas no ámbito da saúde.
Estase a celebrar a Asemblea Xeral anual de NECSTouR, a rede de rexións europeas centrada en promover o turismo sostible e competitivo. A xuntanza que se desenvolve baixo o lema 'Turismo e cultura: da creación ao legado -construíndo territorios resilentes e conectados' ten lugar estes días en Bourges, no Val de Loira (Francia), e no marco da mesma, a entidade vén de acordar a celebración da vindeira cita anual en Galicia coincidindo co Xacobeo 2027. En NECSTouR están representadas un total de 44 rexións europeas e 32 organizacións académicas, asociacións e redes de empresas de turismo sostible, que representan a 19 países europeos.
Alfonso Rueda anunciou que Galicia será a primeira comunidade que regule os exames virtuais para o ensino público non universitario. Esta regulación para a 'educación do futuro', que se encadra na futura Lei de educación dixital, contempla o emprego de 'sistemas biométricos que garantan a autenticidade dos resultados' no caso de probas a distancia sen supervisión docente. Neste sentido, cómpre lembrar que esta Lei incorporará outras medidas destinadas a responder os retos presentes e futuros da educación, como que a comunicación entre profesores e familias se produza só a través de Abalar, a prohibición de gravar clases sen autorización, ou a regulación do uso da intelixencia artificial ou do móbil nas aulas.
