lunes, 12 de mayo de 2025
O presidente da Xunta, Emilio Pérez Touriño, afirmou que Galicia é un país aberto e tolerante, unha cultura nacional que non renuncia a ningunha das súas herdanzas. Así o dixo na inauguración do I Congreso Internacional de Escritores De Pedra e de Palabra, organizado polo PEN Club de Galicia e que reúne en Compostela a literatos de todo o mundo.
O máximo mandatario galego manifestou a súa confianza en que este encontro multicultural servirá para facer valer o papel de Galicia como ponte e espazo de encontro entre mundos literarios e culturais por moitas razóns emparentados, aínda que non sempre suficientemente relacionados. Trátase dunha cita coa que, consonte dixo, Galicia quere abrirlle as súas portas e, ao tempo, mostrarse a Iberoamérica e á Lusofonía, que definiu como riquísimos universos culturais dos que nos sentimos partícipes e cómplices, do mesmo xeito que, engadiu, nos sentimos plenamente integrados nese espazo cultural europeo.
Durante a súa intervención, o xefe do Goberno autonómico expresou o seu convencemento de que os escritores participantes no Congreso comparten cos galegos a sensibilidade cara ás culturas e ás linguas que se desenvolven en espazos xeográficos reducidos, pero que non por iso deixan de pugnar por facérense visibles neste mundo globalizado.
Nesa liña, Pérez Touriño manifestou o seu desexo de que, a través deste encontro, Galicia intensifique a súa relación con grandes espazos literarios que teñen nos idiomas castelán e portugués dous espléndidos instrumentos de comunicación e de creación. Pretendemos que vostedes saiban de nós e do noso país, de Galicia e da súa literatura, engadiu.
Segundo destacou, Galicia conta hoxe cun solvente movemento literario, e, como proba citou ao recente Premio Cervantes, Antonio Gamoneda, quen tras recibir o galardón sinalou que a poesía galega é xunto coa portuguesa, a de maior calidade de todas cantas se están a escribir na Península. O presidente da Xunta completou esta afirmación loando a boa saúde da prosa narrativa galega e da escrita dramática do país.
Longa tradición
Pérez Touriño remarcou o bo quefacer literario dos escritores en lingua galega cunha longa tradición literaria que se remonta ata a Idade Media, cando este recanto da vella Europa alumeou o tesouro universal da lírica trobadoresca galaico-portuguesa.
O titular do Executivo autonómico referiuse tamén aos avatares pouco afortunados que conduciron á práctica desaparición do rexistro escrito da lingua, e ao rexurdimento impulsado por Rosalía de Castro, da que dixo que lle devolveu ao galego a dignidade incomparable da expresión escrita. Relatou que nese momento se reiniciou un camiño que faría de Galicia un espazo literario específico e singular, unha tesela máis, pero con brillo propio, no grande mosaico da literatura universal.
Para o presidente galego, trátase dun camiño que percorremos non sempre á velocidade que todos estimamos desexable. Por iso, afirmou que ten moitas esperanzas postas na Lei do Libro e da Lectura que o Parlamento Galego aprobou antonte por unanimidade. Estou seguro de que esta Lei vai ter unha incidencia moi favorable sobre todos os axentes e instancias que traballan no mundo do libro, e moi nomeadamente sobre os creadores, afirmou.
Pérez Touriño insistiu en que foi a acumulación de culturas, tradicións e modos de vida o que contribuíu a facer de Galicia un país aberto e tolerante, unha cultura nacional que non renuncia a ningunha das súas herdanzas e que fai desta pluralidade de legados e da súa convivencia en paz e liberdade un dos seus principais sinais de identidade.
Finalmente, o titular da Xunta celebrou a iniciativa do PEN Club de organizar en Santiago o I Congreso Internacional de Escritores De Pedra e Palabra e manifestou o seu desexo de que Compostela consolide esta condición de cidade literaria e de lugar privilexiado para o encontro de escritores de todo o mundo para o debate e a reflexión compartida sobre a literatura e os seus problemas.
O presidente da Xunta, Alfonso Rueda, avaliou hoxe a batería de medidas propostas por distintos departamentos autonómicos para garantir o mantemento dos servizos básicos e a atención á cidadanía nos respectivos ámbitos no caso de producirse un apagamento como o rexistrado o luns 28 de abril en todo o Estado. Segundo a análise presentada, a situación vivida nesa xornada puxo de manifesto a urxencia de que o Goberno central impulse a redundancia de operadores de telefonía que dean servizo ao Centro Integrado de Atención ás Emerxencias (CIAE) 112-Galicia para que non dependan dun único operador.
A Xunta de Galicia programa máis de 60 actividades para celebrar as Letras Galegas nas bibliotecas públicas xestionadas polo Goberno galego e expandidas polas catro provincias. Así o destacou hoxe o conselleiro de Cultura, Lingua e Xuventude, José López Campos, que presentou as distintas iniciativas que se van desenvolver nos vindeiros días nestes sete centros e no servizo de bibliotecas móbiles, a través dos cales, puntualizou, 'atopamos a mellor das vías para chegar a todo tipo de público e ofrecerlles propostas variadas co obxectivo de achegarnos ao significado da celebración das Letras e á figura das homenaxeadas este ano, as cantareiras'.
