Notas de prensa

A Mesa acusa a Secretaría Xeral de Política Lingüística de “usar o diñeiro do galego para facer clientelismo”

A Mesa pola Normalización Lingüística manifestou publicamente a súa “profunda preocupación pola deriva que está a tomar a Secretaría Xeral de Política Lingüística (dependente directamente do Presidente da Xunta, Emilio Pérez Touriño), que non só non dá resposta aos problemas máis acuciantes do galego, como a situación do ensino e o caso do Concello da Coruña, senón que está a profundizar nos mesmos camiños fraudulentos dos gobernos de Manuel Fraga Iribarne”.

A Secretaría Xeral presentou un convenio coa Confederación de Empresarios, que supostamente debería servir para potenciar o galego. Porén, desde a asociación cidadá en defensa da lingua matizan o seguinte:

1.- Existe unha falta total de transparencia neste convenio. A Secretaria Xeral de Política Lingüística anunciou que ía asinar o acordo, e cun investimento non inferior aos 750.000 euros, antes mesmo de que a Confederación de Empresarios presentase ningún proxecto.

O 13 de xaneiro de 2006, a Secretaria Xeral de Política Lingüística, María Sol López, afirmou publicamente o seguinte, que citamos literalmente dun comunicado de imprensa emitido pola Xunta de Galiza: “Estamos á espera de que a Confederación de Empresarios nos presente un proxecto de normalización que vai englobar a todos os seus asociados e que contará coa nosa axuda técnica e económica, cunha partida non inferior aos 750.000 euros”.

Desde A Mesa pola Normalización Lingüística manifestamos daquela a nosa estrañeza porque se tivese tan claro que se ía investir unha cantidade económica tan elevada para un proxecto que nin sequera estaba elaborado e, mesmo, cando aínda a Secretaría Xeral non preparara unha mínima planificación para o ano 2006. Tamén nese momento, desde A Mesa exiximos que houbese “luz e taquígrafos” e que o programa a asinar implicase resultados positivos para o galego. A Mesa continúa a reclamar que se faga un seguimento continuado e público deste acordo.

2.- A Secretaría Xeral de Política Lingüística elimina as convocatorias públicas de axudas a empresas para a súa galeguización e pasa a entregarlle esa partida orzamentaria na súa totalidade á Confederación de Empresarios, que exclúe a quen non sexan os seus asociados.

Desde A Mesa levábamos tempo solicitando “un cambio de chip” no concepto das subvencións para promoción do uso do galego. Porén, o proxecto da Secretaría Xeral significa un retroceso histórico, pois non corrixe un modelo que antes tiña erros (como a falta de seguimento das axudas), senón que o elimina totalmente, desaparecendo así un aliciente que tiñan moitas pequenas empresas para procederen á súa galeguización. Porén, non se dan tampouco agora garantías de seguimento para o macroconvenio entre a Secretaría Xeral de Política Lingüística e a Confederación de Empresarios, e o que antes era un procedemento aberto, agora restrínxese a un grupo determinado.

3.- A SXPL paga dúas veces por un servizo que a propia Administración xa ofrece.

O mes pasado, a Secretaría Xeral de Política Lingüística enviou un comunicado de imprensa indicando que ao longo do que levamos de 2006 asesorara a case 650 empresas e asociacións para que pasasen a usar o galego. Se a SXPL xa fai iso gratuitamente, por que lle paga á Confederación de Empresarios para que faga exactamente o mesmo? Cales van ser os beneficios para o galego desta duplicidade?

4.- A Confederación de Empresarios leva moitos anos recibindo subvencións de Política Lingüística da Xunta e, porén, continúa a facer uso minoritario do galego. Por non ter, non ten nin opción nesta lingua da súa páxina web.

A Mesa exíxelle á Secretaría Xeral de Política Lingüística que fiscalice urxentemente en que se investiron os milleiros de euros que recibiu a Confederación de Empresarios ao longo dos últimos anos, pois a entidade continúa sen facer un uso normal do galego a pesar de todas as subvencións que recibiu para iso.

Máis contraditorio aínda resulta que se diga que a través deste convenio a Confederación de Empresarios vai colaborar a galeguizar páxinas web cando no seu propio sitio en internet (www.ceg.es) non hai opción real en galego (a páxina de benvinda está en castelán e formalmente aparecen as opcións das dúas linguas cooficiais, mais cando se clica en “Galego” saen os contidos igualmente en castelán...).

5.- Este macroconvenio é exemplo de pésima xestión, de incompetencia para desenvolver a política lingüística que precisamos. Significa continuar coa liña practicada polo PP de utilizar o diñeiro do galego para estender a rede clientelar.

Unha das principais críticas contra os gobernos de Manuel Fraga neste campo de xestión era que distribuía as partidas da política lingüística sen outra pretensión que a de afortalar o favoritismo e a dependencia da cidadanía das prebendas do poder, nunha distracción fraudulenta de diñeiros públicos que non se correspondían coa finalidade prevista.

Lamentabelmente, a Secretaría Xeral de Política Lingüística (dependente agora do Presidente da Xunta), mantén a mesma política viciada, gastando supostamente moito diñeiro no galego, aínda que a maioría desas partidas orzamentarias non teñen máis finalidade que a homenaxe lingüística, o gasto para conmemorar sen obxectivos de recuperación ou o clientelismo, como é o caso deste macroconvenio. Así, a actual Política Lingüística, dirixida por Emilio Pérez Touriño, parece a crónica dun fracaso buscado e desexado.