miércoles, 12 de agosto de 2026
O presidente da Xunta, Emilio Pérez Touriño, apostou por acometer unha reforma de modelos e estruturas e escasamente eficientes en vigor na escea galega para lograr que a relación entre o teatro e a sociedade sexa máis intensa, máis fluída, máis habitual e máis cualificada. Para acadalo, Pérez Touriño amosou o seu desexo de que esta reforma se leve a cabo tendo en conta os profesionais do teatro, as compañías das que forman parte e as asociacións e colectivos nos que se agrupan.
Así o asegurou durante a súa intervención ante os participantes no XIII Congreso da Asociación de Directores de Escena de España (ADE), que se celebra estes días no Pazo de Mariñán (Bergondo). Tras salientar a calidade artísticas e profesional de moitas das producións teatrais galegas actuais parangonable á de calquera outra escena- Pérez Touriño explicou que o Goberno autonómico acometerá un importante esforzo para converter a Escola Superior de Arte Dramática de Galicia un centro referencial, xerador de profesionais ben formados e con amplas capacidades de emprego.
Así mesmo, sinalou que se está a traballar na mellora do funcionamento do Instituto Galego das Artes Escénicas e Musicais (Igaem) e das unidades de produción del dependentes, así como no da Rede Galega de Teatros e Auditorios. Neste labor, subliñou o presidente, contarase coas compañías e os profesionais, pois , agregou, sen o seu concurso e implicación activa sería complicado que as reformas foran máis alá dos papeis oficiais
O presidente valorou o traballo realizado en Bergondo pola ADE, facendo especial fincapé no debate sobre as bases dun proxecto de Lei de Teatro que está a elaborar a asociación. Finalmente, gabou o papel esencial desta asociación no artellamento do teatro profesional no conxunto de España e transmitiulles os parabéns pola organización do congreso.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
