sábado, 17 de mayo de 2025
O desdobramento da actual Vía do Barbanza, para a súa conversión en autovía, permitirá incrementar a capacidade de tráfico e a seguridade viaria nun trazado que rexistra un alto índice de sinistralidade e mortalidade.
Cunha lonxitude de 40,100 quilómetros, dos que 10 discorren en variante, a futura autovía entre Padrón e Ribeira contará con dúas calzadas de 7 metros cada unha, separadas por unha mediana de 1,2 metros -o que elimina o risco de colisión frontal-, con beiravías exteriores de 2,5 metros e interiores de 1 metro. Ademais, de cara a gañar máis cotas de seguridade, ampliaranse os radios das curvas e reduciranse as pendentes.
O trazado contará con doce enlaces -adaptación dos xa existentes- que permitirán o acceso á autovía dende os principais núcleos de poboación da zona e facilitarán a comunicación na comarca do Barbanza. Trátase, en concreto, das conexións de Padrón (N-550), Dodro-Lestrove, Rois-Imo, Bexo, Catoira-Vilagarcía, Rianxo, Taragoña, Boiro, Pobra (Norte e Sur), Palmeira e, finalmente, Ribeira.
O proxecto contempla, por outra parte, a construción de 11 viadutos, que permitirán salvar a orografía da zona, canles fluviais e outros obstáculos, entre os que destaca pola súa singularidade o viaduto sobre a Ría de Arousa, de 700 metros de lonxitude.
A Autovía do Barbanza contará con 51 pasos inferiores e 29 superiores, que facilitarán a comunicación entre ambas marxes. Esta infraestrutura viaria beneficiará, non só aos máis de 80.000 habitantes dos concellos polos que discorre (Padrón, Dodro, Rianxo, Boiro, Pobra do Caramiñal e Ribeira), senón tamén ao resto da poboación galega, dado que mellorará considerablemente a comunicación cunha comarca de gran interese turístico como é a do Barbanza.
As obras iniciadas hoxe contan cun prazo de execución de 27 meses, cunha redución de nove meses sobre o período establecido nas condicións do concurso público.
Concesión a 30 anos
A construción, financiamento e explotación desta infraestrutura corresponde á sociedade Autovía del Barbanza, Concesionaria de la Xunta de Galicia, S.A., adxudicataria da concesión e integrada polas empresas Itinere Infraestruturas, S.A. e Corporación Caixa Galicia.
Esta sociedade asume na súa totalidade o financiamento das obras, nas que investirá un total de 127.199.339 euros, cantidade na que se inclúe o custe das expropiacións (5,5 M ) e da vixilancia e seguimento ambiental e patrimonial (0,2 M ).
Como contraprestación e unha vez posta en servizo a totalidade da autovía, a CPTOPT aboará á concesionaria un canon de demanda que virá determinado polo número de usuarios desta infraestrutura, sen que estes teñan que pagar ningún tipo de peaxe. A concesión para explotar a Autovía do Barbanza ten unha vixencia de 30 anos, contados a partir da posta en servizo da totalidade desta infraestrutura.
Así mesmo, a Consellería esixirá uns niveis de calidade aceptables, tanto no que se refire á construción da autovía como ao seu mantemento e conservación. Neste senso, establecerá uns indicadores de calidade do servizo e do estado da infraestrutura de xeito que o seu grao de cumprimento repercutirá directamente nas achegas que a sociedade concesionaria reciba do departamento de Política Territorial.
O ciclo de concertos Orballo Cultural vén de presentar a súa edición 2025, que se celebrará entre os meses de maio a setembro. Este ciclo propón levar ata distintas localidades da xeografía galega, concretamente aos concellos de Estrada, Tomiño, O Porriño, Ribadavia, Muxía, Noia, Ferrol e Sanxenxo, a artistas da escena musical galega. Entre os nomes xa confirmados están Xabier Díaz & Adufeiras de Salitre, Su Garrido Pombo, Herdeiros da Crus ou The Limboos. O ciclo Orballo Cultural busca unir a variada oferta musical de Galicia co patrimonio cultural e natural de distintas localidades, de tal modo que se pon en valor a rica variedade de opcións turísticas da comunidade. Ademais, integra a gastronomía e a artesanía como valores engadidos, nunha proposta que quere apostar pola sostibilidade e a igualdade.
A exposición afonda na realidade das cantareiras dende o século XVIII ata os nosos días. Daquelas, as mulleres das aldeas tocaban por pura necesidade, xa que non había outra maneira de escoitar música ca creándoa. Frei Rosendo Salvado e Rosalía de Castro xa se interesaron no seu tempo polas cantigas populares galegas considerándoas 'pura poesía, sen artificio' a pesar de estar nunha lingua diferente da oficial e proviren de mulleres labregas, de clase baixa. Rosalía foi, de feito, quen máis se identificou con esa literatura, empatizando co sentimento do pobo e levándoo ás altas esferas da época. A mostra tamén recolle, a través de varios documentos, o interese de persoas estranxeiras como Dorothé Schubarth, Alan Lomax ou Gustav Henningsen pola nosa tradición.
