Notas de prensa

A UVigo convoca a oitava edición dos premios de investigación, transferencia e divulgación científica do Campus Auga

A iniciativa xorde tendo en conta que unha das accións estratéxicas do Campus Auga, campus de especialización acreditado e financiado pola Xunta de Galicia, é premiar este esforzo da comunidade universitaria no desenvolvemento da súa singularización. Mediante estes galardóns, a institución académica recoñece o traballo do persoal docente e investigador, persoal investigador e estudantado no ámbito da investigación, transferencia e a divulgación científica en temáticas relacionadas coas liñas de especialización do Campus Auga. “Trátase de contribuír desta forma a mellorar a proxección investigadora e social do campus de Ourense-Campus Auga, como un campus líder nestas temáticas”, sinálase na convocatoria.

Teses, traballos fin de estudos, accións divulgativas e contribucións científicas

Os premios contan con diferentes modalidades, habendo premio para o traballo fin de grao/traballo fin de mestrado máis destacado; premio de investigación a teses de doutoramento; premio de investigación á mellor contribución científica de alto impacto publicada en 2023, 2024 ou 2025; premio ao mellor resultado de transferencia e premio a accións ou actividades de divulgación científica. Enténdese por contribucións científicas aquelas que se realizan nos medios de difusión propios de cada ámbito de coñecemento, como poden ser artigos en revistas indexadas, libros, capítulos de libros, monografías, recensións, etc. Cada traballo ou mérito deberá, de maneira obrigatoria, presentarse a unha das liñas de especialización (alimentación funcional; agricultura e medio ambiente e xestión da auga termal) e áreas transversais de soporte (intelixencia artificial, economía circular e lexislación agroalimentaria e ambiental) do Campus Auga.

Poderán concorrer a estes galardóns o persoal docente e investigador e o persoal investigador que no momento da convocatoria se atope en situación de servizo activo na Universidade de Vigo e o alumnado desta institución académica matriculado nos cursos 2023-2024 ou 2024-2025, que cumpra as condicións da modalidade do premio ao que se presenta. As candidaturas serán valoradas por unha comisión formada polo director do Campus Auga, que actuará como presidente; cinco persoas pertencentes ao sector de persoal docente e investigador, con dedicación a tempo completo e vinculación permanente, que sexan membros das comisións académicas dos programas de doutoramento adscritos ao Campus Auga, e unha persoa representante da empresa Viaqua Gestión Integral de Aguas de Galicia. Entre os criterios que se valorarán estarán aspectos como a vinculación con algunha das categorías ou liñas de traballo indicadas na convocatoria, a calidade e rigor do traballo e o seu impacto ou utilidade.

Os premios consistirán no recoñecemento público outorgado pola Universidade de Vigo a través dunha certificación oficial que, de ser posible, será entregada nun acto institucional organizado a tal efecto. Asemade, haberá unha dotación económica que varía segundo a modalidade. En cada modalidade haberá tres premios en metálico, excepto en divulgación no que haberá un. A dotación total dos galardóns ascende a 12.000 euros e inclúese no convenio de colaboración asinado entre a Universidade de Vigo e a Consellería de Educación, Ciencia, Universidades e Formación Profesional da Xunta de Galicia para financiar o Campus Auga.