jueves, 29 de enero de 2026
Seguimos apostando por artistas do país e por diversas especialidades que van dende o folk ata estilos máis urbanos. Así define a vicerreitora de Estudantes e Cultura, Pilar Murias, a programación musical da Primavera Cultural que con enorme éxito vén ateigando de estudantado cada un dos concertos impulsados pola USC. Na Primavera Cultural 2026 actuarán no Campus de Lugo XMaseda65, Lina e Lola + Unto Vello, Zeltia Irevire, XianPais + Ulex, Kid Mount + ünder & Diego Flâneur, Sofía Espiñeira, O Xoán e a Coral Lucus Terra IV Ciclo. Pola súa parte, Santiago de Compostela acollerá as actuacións de Alana e Kid Mount, así como a final do terceiro Certame de Grupos Musicais da USC con ünder & Diego Flâneur. Ademais, a Orquestra e Coro da USC interpretará o seu concerto de primavera nos dous campus e conmemorará en Compostela, o 21 de xuño, o Día Europeo da Música.
Exposicións
Nos vindeiros meses tamén se inicia unha nova etapa expositiva na USC con proxectos de moi diversa natureza. Trátase de Ficcións especulativas, Auga, lodo e capital de Álvar Calvet, Virando o rosa de Diana Fajardo, Verde: un bico superficial sobre o costado do rostro de Luciana Rago, Iguais baixo o sol. Unha mirada profunda ao albinismo na África subsahariana, Mulleres e comercio na Galicia, séculos XIX e XX, Organspace de Xoán Xil, Arxila, auga e lume de Xurxo Oro Claro, As voces de Begoña Caamaño, Espazo imprevisto de Óscar Aldonza e Fausto García, Historia dos movementos feministas, A Galicia inédita. II edición e 100 anos da Biblioteca América.
Teatro e danza
O XXX Festival Internacional de Teatro Universitario chega a Compostela no mes de febreiro e o XXXII Festival de Teatro Universitario terá lugar en Lugo en abril. A estas citas xa consolidadas no panorama cultural de Galicia hai que engadir o EscaparArte, a estrea da Compañía de Teatro da USC-Lugo coa obra Do marabilloso mundo dos animais: os años, a estrea da Compañía Vaites Vaites IV Ciclo coa peza A asemblea das mulleres, a XXVI Mostra de Teatro Universitario de Galicia, a presentación do traballo final do estudantado da Escola de Teatro ou a interpretación de Irmás de Pascal Rambert, a cargo da Aula de Teatro da USC. Compañía de Teatro. No capítulo de danza, cómpre destacar o V Tradi-Fest, a X Semana da Danza Latina, o XXIV Encontro de Danza da USC e o IV MilongUSC.
Faíscas Culturais
O programa Faíscas Culturais continúa neste 2026 co obxectivo de prender a reflexión cultural nas aulas da USC e complementar a formación do estudantado a través de intervencións e actividades de carácter cultural. Así, nesta Primavera Cultural manterase a colaboración co Centro Dramático Galego a través das Faíscas To be or not to be: Hamlet en Santiago de Compostela, e A sociedade nos anos 40: O neno labrego en Lugo. Nos vindeiros meses tamén terán lugar as Faíscas Laboratorio de ficcións especulativas en Compostela e A perda en Lugo. As Faíscas Culturais son proxectos artístico-pedagóxicos que se sitúan na intersección que existe entre o coñecemento académico e a expresión artística e cos que se pretende fomentar o espírito crítico do estudantado.
Foros, formación e convocatorias
A palabra é tamén protagonista da Primavera Cultural a través de diversos foros nos que se analizan e debaten cuestións de actualidade e alcance, como é o caso dos Encontros de Lúa Chea, impulsados polo colectivo Proxéctate en galego. Outro exemplo é o Microaberto, no que as persoas inscritas poden intervir con monólogos, textos, poemas ou no formato oral no que desexen expresar a súa creatividade. A estas dúas citas do Campus de Lugo, cómpre engadir o xa tradicional Curso de Primavera.
No eido da formación, desenvolveranse en Compostela diversos Monográficos de Arte Escénica que abarcan contidos como Interpretación, Escrita dramática, View Points, Iluminación escénica e Dirección de escena. A todo esta ringleira de iniciativas débense sumar as convocatorias para fomentar a creatividade e a dinamización da comunidade universitaria. Trátase da Convocatoria de axudas ao desenvolvemento de actividades de dinamización físico-deportiva e cultural organizadas polo estudantado da USC e a Convocatoria de axudas á creación e aos proxectos de agrupacións teatrais e de danza da USC.
Audiovisuais e fotografía
Finalmente, o Campus de Lugo, cuxo programa de actividades presentouse este martes 27 nun acto no Pazo de Montenegro, continuará un ano máis acollendo as Sesións de Filmoteca do Club Valle-Inclán, e impulsando o certame Findecurta co que promover a creación audiovisual de estudantado e cidadanía no seu conxunto.
A Primavera Cultural da USC conta co apoio de Concello de Lugo, Deputación Provincial de Lugo e Deputación Provincial da Coruña.
O virus respiratorio sincitial (VRS) continúa a aumentar a taxa de positividade e acada o 10,8 % na semana 4 do ano (do 19 ao 25 de xaneiro), fronte ao 9,8 % da semana previa, tal e como recolle o informe semanal de seguimento deste virus que publica a Consellería de Sanidade. Nesta última semana, obsérvase un incremento na taxa de consultas en atención primaria por bronquiolite en menores de dous anos. En concreto, o incremento foi do 19 % no grupo de nacidos entre abril e setembro de 2025. En canto a hospitalizacións, rexistráronse tres ingresos na última semana no grupo de nados entre abril e setembro de 2025 e catro hospitalizacións de lactantes menores de dous meses, que están a pasar a súa primeira onda do VRS este inverno.
O modelo de financiamento autonómico e a condonación da débeda propostas polo Goberno central supoñen un prexuízo para os galegos de case 1.000 millóns de euros, 600 millóns de incremento da débeda e 305 millóns menos que a media das CC.AA. de réxime común na proposta do Sistema de Financiamento Autonómico. A suposta condonación da débeda ofrecida polo Goberno é unha mutualización da mesma, porque aínda que baixa a débeda autonómica en 4.000 millóns de euros, sube a participación da poboación galega na débeda do Estado en 4.600 millóns de euros.
