Notas de prensa

O Festival Internacional de Teatro de Ourense cumpre a maioría de idade

A edición deste 2025 foi presentada este mércores no Teatro Principal de Ourense por representantes das entidades que apoian o Fito, estando Francisco Javier Rodríguez Rajo, vicerreitor do campus de Ourense; Jacobo Sutil, director de Agadic (Xunta de Galicia); César Gil, vicepresidente da Deputación de Ourense; Olga Mojón, directora do Teatro Principal; Fina Calleja, directora do festival, e José Luis Troitiña, xerente do Liceo Recreo Ourensán.

Nas súas intervencións coincidiron en destacar unha vez máis que este festival é mostra e froito da colaboración entre diferentes institucións e unha cita de referencia no ámbito teatral ourensán e galego. O vicerreitor do campus subliñou que Fito é “un tesouro que temos en Ourense” e apuntou que a participación da UVigo nesta e noutras citas teatrais forman parte do seu compromiso con esta rama das artes escénicas que, apuntou, fomentan na comunidade universitaria e na cidadanía en xeral “a aprendizaxe, a educación, o diálogo e os valores”.

A emoción do teatro

“Tras 17 anos de traxectoria fértil, o FITO mantén intacta a súa ambición de expansión e influencia, deseñando unha programación que abraza á cidadanía no seu conxunto”, explican desde Sarabela Teatro, compañía encargada do certame e tamén das aulas de teatro do campus de Ourense. As actuacións terán lugar os días 16, 18, 19, 22, 23, 24, 25 e 26 e “co horizonte posto na diversidade, a inclusión e a accesibilidade a programación abraza unha rica variedade de formatos e estilos: desde a vibrante enerxía do teatro de rúa á intimidade do teatro de sala, pasando pola potencia do teatro de texto, a danza contemporánea e o compromiso do teatro documental e performático”. Trátase, sinalou Fina Calleja na presentación do festival, “dunha edición de continuidade”, que recolle moi ben tanto “o momento extraordinario polo que pasa o teatro galego” como “a emoción que ten que levar sempre o teatro”.

As representacións terán lugar no Teatro Principal, no Liceo, no Edificio de Ferro do campus de Ourense e na Agrupación Cultural Auriense. Actuarán as compañías galegas Elefante Elegante, Butaca Zero, Redrum, Priscila, Barrosanta e Mofa e Befa; a madrileña Nacho Vera; a estremeña Guirigai e a arxentina Suttotos. Ademais, neste FITO 2025 o campus acollerá o día 22 unha nova edición da iniciativa 67 Graos. Ourense Fervescénica, que dá visibilidade a diferentes creadores e artistas, neste caso a cinco propostas. Boa parte destas actuación serán estreas.

No horizonte de 2025, o Festival Internacional de Teatro de Ourense, sinalan desde a súa organización, “eríxese novamente como un baluarte da cultura democrática e un catalizador esencial para o intercambio de saberes”. Esta edición, engaden, “concíbese como unha plataforma dinámica onde converxen múltiples xéneros, experiencias vitais e formas de expresión artística, tecendo pontes de comunicación tanto co seu público fiel, que ano tras ano agarda esta cita, como con aqueles que aínda non descubriron o seu atractivo singular”.