sábado, 8 de agosto de 2026
Na sesión presidida polo reitor Antonio López, tamén interviñeron a vicerreitora de Igualdade, Cultura e Servizos, Mar Lorenzo Moledo, Susana López Abella, secretaria Xeral da Igualdade; e Mercedes Rosón, concelleira responsable de Igualdade. Temos moito que facer se miramos ao futuro, dixo Antonio López para logo subliñar que é necesario afirmar con contundencia que existen as discriminacións por razón de xénero e que se non se pode afastar a ollada para outro lado.
O manifesto deste 8M pon o foco no estudo Brecha salarial de xénero nas universidades públicas españolas, froito da colaboración entre o Ministerio de Universidades, a ANECA e a CRUE, e que revela a existencia de fendas salariais no PDI. Segundo ese informe, a diferenza salarial é claramente visible na percepción de complementos, sendo os homes os que acceden en maior número a estes ingresos, apunta o manifesto. A causa posible é o menor exercicio dos dereitos de conciliación e liberación do tempo de corresponsabilidade que exercen os homes para atender o coidado familiar, destaca o documento. Polo que respecta ao PAS, os estudos diagnósticos das respectivas universidades apuntan a unha diferenza salarial menor pola composición feminizada do persoal, pero, aínda así, a fenda salarial existe e vincúlase, entre outras causas, ao exercicio dos dereitos de conciliación por coidado familiar, nos que apenas se aprecia unha mellora da corresponsabilidade.
Fenda dixital
Outro dos aspectos destacados polo manifesto é como, a pesar de que a presenza das mulleres nas universidades aumentou, a ausencia destas nas carreiras de Ciencia, Tecnoloxía, Enxeñaría e Matemáticas (CTEM) segue a ser sobranceira, así como nos postos de responsabilidade. Somos conscientes da enorme importancia que o dominio das tecnoloxías terá no futuro, resultando estratéxicas para acceder a ocupacións que posúan gran relevancia social. Hai que traballar para erradicar a actual fenda dixital de xénero, producida por nesgos androcéntricos que dificultan ou menoscaban a igualdade entre os sexos, afirma o manifesto. A necesaria implantación dos estudos de xénero e da transversalización da perspectiva de xénero na docencia, a investigación, a transferencia e o compromiso social, como as vías máis potentes para aumentar a concienciación e a prevención das discriminacións, é outra das reivindicacións contempladas no documento.
Recoñecemento
O acto serviu para facer entrega da placa con Mención Honorífica á Comisión de atención ás situacións de acoso sexual, acoso por razón de sexo, orientación sexual e identidade de xénero que recolleu Ángela Juana Torres Iglesias, profesora da USC e presidenta da Comisión. A sesión tamén contou co relatorio Igualdade e xénero humano a cargo de Carmen Blanco, escritora e profesora da USC.
Axenda #USC8M
Ademais da lectura institucional do manifesto que se levou a cabo en diversos centros dos campus de Santiago e Lugo, a USC desenvolve co gallo do 8M unha nutrida axenda de actividades. Así, este mesmo luns 7, a Facultade de Psicoloxía acolle as V Xornadas de Psicoloxía e xénero. Ademais, este centro dá pulo ao certame Expresión artística do feminismo, dirixido a alumnado de grao mestrado. Pola súa parte, a Escola Técnica Superior de Enxeñaría (ETSE) acolle este martes 8, a partir das 13.00 horas, a charla Homes e mulleres no traballo a cargo de Laura Hospido Quintana, economista do Banco de España.
A biblioteca da Facultade de Ciencias da Comunicación impulsa a iniciativa m 2=muller en potencia e que consiste na incorporación de dúas fotografías dos graffitis do movemento Mujeres Creando (A Paz, Bolivia). Este martes 8, tamén a partir das 13.00 horas, procederase ao acto de entrega de premios a traballos fin de grao do VI Concurso Enxeñaría e Muller Rural da Escola Politécnica Superior de Enxeñaría (EPSE). Ademais, contarase co relatorio O papel da Muller Enxeñeira na Cooperación Internacional, a cargo de Raquel Zolle, enxeñeira de Montes e membro de Enxeñeiros sen Fronteiras.
A relevancia da documentación xudicial nos estudos de xénero: o caso das espontáneas é a actividade coa que o Arquivo Histórico Universitario conmemora o 8M. Na charla interveñen Désirée Mª Domínguez Pallas, directora do arquivo; e Ángel Arcay Barral, investigador e actual arquiveiro do concello de Santiago. O acto comezará ás 18.00 horas deste 8 de marzo na sala de conferencias do arquivo. É precisa a confirmación de asistencia no enderezo arquivo.historico@usc.es ou no teléfono 881 812 880. O seminario web Encontro de mulleres traballadoras do mar, organizado por EqualSea Lab do CRETUS é outra das iniciativas que nutren este 8M na USC.
O 9 de marzo será a quenda da conferencia A Primeira Enxeñeira de Montes de Galicia, a cargo de Isabel Fernández García, catedrática de Química Inorgánica. O relatorio terá lugar no salón de actos da EPSE a partir das 12.30 horas. Mulleres e Química, a cargo de Xoana Pintos Barral, é o título do relatorio que se desenvolverá na Aula Magna da Facultade de Química ás 13.00 horas. Na mesma xornada, celebrarase a proxección e debate de Buda explotó por vergüenza de Hana Makhmalbaf (2007), no marco do ciclo de Cinema Filosófico que ás 18.00 horas acolle a Facultade de Filosofía.
Este mesmo centro alberga a colocación dun cartel en homenaxe ás vítimas de violencia de xénero dos últimos meses. Esta iniciativa está organizada pola Comisión de Igualdade de Xénero da Facultade de Filosofía e coordinada por Cruz Fernández, estudante do mestrado de Filosofía. O acto terá lugar o xoves 10 de marzo, ás 14.00 horas. Nesa mesma xornada, ás 19.30 horas, desenvolverase o relatorio As mulleres filósofas e súa importancia histórica na corrente filosófica analítica, a cargo do profesor Xavier de Donato Rodríguez.
A Facultade de Administración e Dirección de Empresas do campus de Lugo acolle o venres 11, ás 12.00 horas, a conferencia Non as esquezas: traballos das mulleres galegas, a cargo de Mari Carmen Casasnovas, vicepresidenta da Área de Mulleres da Federación de Veciños de Lugo. O 31 de marzo, ás 16.00 horas, desenvolverase a conferencia Feminismo, coñecemento e valor na cultura-rede, a cargo de Remedios Zafra, escritora e investigadora do Instituto de Filosofía-CSIC no marco das VII Xornada Mulleres na ciencia. O acto está organizado pola Oficina de Igualdade de Xénero e a Asociación AMIT-Gal.
As mostras Mulleres na Psicoloxía (Andar 1-Módulo A da Facultade de Psicoloxía), Porque elas foron, nós seremos (Facultade de Relacións Laborais) e Mulleres economistas (Facultade de Ciencias Económicas e Empresariais) completan un programa de accións que tamén contempla a convocatoria da III Edición dos premios Mª Carmen Guisán e Mª Xose Rodríguez Galdo aos mellores TFG ou TFM que inclúan a perspectiva de xénero.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
