miércoles, 18 de marzo de 2026
O prazo de matrícula para todos os cursos abre o vindeiro 4 de xuño. Para os tres primeiros pechará o 17 do mesmo mes; para o de termalismo estará aberto ata finais de agosto, xa que se celebrará en setembro. Os prezos varían entre os 13 e os 145.
Aprender a facer o teu propio satélite
Unha das propostas que a Vicerreitoría de Captación de Alumnado, Estudantes e Extensión Universitaria presenta para este período estival é o curso Fai o teu propio satélite, no que se poderá adquirir unha visión xeral de todos os elementos que compoñen un sistema espacial e os retos e beneficios que levan asociados estes sistemas. O curso desenvolverase entre o 26 e o 30 de xullo de xeito presencial na Escola de Enxeñaría de Telecomunicacións en horario de 09.00 a 14.30 horas.
O obradoiro permitirá a familiarización cos sistemas espaciais, centrada nos pequenos satélites; o coñecemento dos subsistemas e elementos dun pequeno satélite; realización de análises de misións espaciais; elaboración de probas prácticas dun sistema de comunicacións LoRa; desenvolvemento dun prototipo de circuíto en PCB para sistemas espaciais e desenvolverse en retos de deseño nunha contorna espacial. Deste xeito, o alumnado inscrito poderá adquirir as competencias básicas de desenvolvemento de misións espaciais e plataformas satélite baseadas no estándar CubeSat.
O curso será impartido por estudantes das enxeñarías da Universidade de Vigo e enxeñeiros con experiencia en misións espaciais, que actualmente se atopan desenvolvendo unha misión destas características. Ademais, realizarase unha visita á estación de terra á que ten acceso o grupo UVigo SpaceLab. O prezo do curso é de 13,88 para a comunidade universitaria e 21,35 para o público alleo á mesma.
Primeira edición dun campamento de xeoloxía
Outra das novidades deste verán será o un Campamento de Xeoloxía, que terá lugar do 16 ao 20 de xullo nos afloramentos do Paleozoico Superior e Mesozoico da montaña palentina, que constitúen un espazo natural idóneo para a docencia xeolóxica dende un punto de vista estratigráfico, sedimentolóxico, tectónico e xeomorfolóxico do patrimonio xeolóxico e da minería do carbón. O obxectivo é que as persoas participantes aprendan a usar, comprender e interpretar un mapa xeolóxico; recoñezan e caractericen rochas sedimentarias en campo; interpreten series, seccións e estruturas sedimentarias e estruturas tectónicas a pequena e grande escala, así como a historia xeolóxica e identifiquen os aspectos máis relevantes en campo de xeomorfoloxía e sistemas cársticos.
Durante a actividade visitarase o Centro de Interpretación Mineira de Barruelo de Santullán e as explotacións mineiras de carbón da montaña palentina. Tamén se poderán coñecer exemplos de minería e patrimonio xeolóxico, e os participantes deberán aplicar os coñecementos aprendidos a un caso práctico.
A actividade inclúe o traslado en autobús de Vigo a Palencia e o aloxamento durante catro noites na localidade palentina de Barruelo de Santullán. O prezo do curso é de 94,64 para a comunidade universitaria e de 145,60 para as persoas externas.
Percorrido histórico por Galicia
Outra das alternativas percorrerá física e historicamente a terra galega. O curso, que terá lugar do 6 ao 23 de xullo, propón un repaso polos feitos que cambiaron o devir político e social de Galicia ao longo dos séculos. Para isto o programa céntrase en cinco dos fitos ou momentos históricos determinantes para a historia galega: celtas e romanos; cristianismo e Camiño de Santiago; o rexurdimento das cidades; a emigración e, finalmente, xa no século XX, a Guerra Civil, o franquismo e a chegada da democracia.
Cada un destes temas abordase nunha sesión teórica e cunha visita guiada para explicar os aspectos e conceptos tratados. As conferencias desenvolveranse no edificio Redeiras, a nova sede institucional da Universidade de Vigo no Berbés, e as visitas permitirán ás persoas asistentes coñecer o castro de Santa Trega, o Camiño Portugués da Costa; a Ruta dos Pazos e Fortalezas; a Estación Marítima de Vigo e o Mosteiro de Oia.
O curso arrancará o luns 5 de xullo, cunha sesión inaugural, de 10.00 a 12.00 h. e continuará os días 7, 9, 12, 14 e 16 de xullo en horario de 09.00 a 15.00 h. O prezo varía entre os 32,50 da comunidade universitaria e os 50 do público Xeral.
Termalismo, saúde e Benestar
A programación estival de cursos complétase cunha propostas xa habitual na oferta de Extensión Universitaria: Termalismo, saúde e benestar. O curso consta de conferencias, mesas redondas e debates, que terán lugar na Facultade de Ciencias do Mar, e prácticas sobre os temas tratados nas conferencias que se desenvolverán nos balnearios de O Carballiño, Laias, Mondariz, de Acuña e Talaso Atlántico. O curso desenvolverase do 1 ao 4 de setembro e os prezos varían entre os 32,50 ou 50.
A formación conta coa colaboración dos profesionais da medicina, fisioterapia e actividades físicas que habitualmente exercen a súa actividade profesional nos centros termais. O curso permitirá aos asistentes adquirir os coñecementos básicos sobre os distintos tipos de augas e os seus beneficios; coñecer os balnearios galegos e o seu funcionamento, dende un punto de vista da saúde e do benestar; coñecer os produtos derivados das augas mineromedicinais e mariñas; vincular o termalismo coa saúde e hábitos de prevención e benestar e realizar prácticas de aplicación de augas mineromedicinais e peloides termais.
Con esta decisión, procúrase ampliar a internacionalización, unha maior apertura á creatividade dixital coa irrupción das novas tecnoloxías e darlle pulo a súa descentralización dentro e fóra de Galicia. O obxectivo con esta renovación é impulsar estes eidos na actividade deste centro museístico, referente da arte contemporánea en Galicia e España, tras case once anos con Santiago Olmo á fronte da súa dirección. Como resultado do seu labor, o Centro Galego de Arte Contemporánea acadou en 2025 ser recoñecido como Insignia da cultura galega polo Observatorio da Cultura da Fundación Contemporánea, segundo os resultados do prestixioso informe elaborado coas valoracións de máis de 400 expertos e profesionais de toda España.
O presidente da Xunta informou de que 'Galicia vai liderar un val especializado en tecnoloxía cuántica no que participarán nove países europeos' e que contará cun investimento de 14,3 millóns de euros. Rueda lembrou que a comunidade 'está a posicionarse como referente europeo' neste eido e asegurou que o feito de que Galicia lidere un proxecto 'nunha materia con tanto futuro é un reflexo da boa saúde da I+G+i galega'. A Comisión Europea acaba de conceder un novo proxecto de cuántica polo que a nosa Comunidade vai liderar un val de innovación, é dicir, unha iniciativa de colaboración entre rexións que destacan pola súa capacidade neste ámbito e que, grazas a este val, van conectalas para facer novos desenvolvementos e incrementar a soberanía da UE.
