Notas de prensa

As empresas galegas danlle a benvida ao futuro dixital nas Xornadas Tecnolóxicas R

R celebrará este mércores, 28 de outubro, as Xornadas Tecnolóxicas R 2020, un dos eventos anuais de referencia no sector TIC, no que se intercambian experiencias de éxito e onde se expoñen de forma práctica e próxima os retos das empresas na nova era dixital. Esta edición celebrarase online, nun ‘edificio virtual’ para respectar as medidas de distanciamento social impostas pola pandemia da COVID-19.

“Data Driven Company, benvido ao futuro dixital” é o lema baixo o cal se abordarán este ano temáticas variadas, como a Intelixencia Artificial Aplicada, as comunicacións do futuro, a empresa dixital, a nova normalidade e as necesidades que xorden dela, a cloud híbrida ou os servizos IT. Nesta xornada exclusiva, as empresas asistentes poderán coñecer como a tecnoloxía e os datos serán a panca clave para o seu crecemento e competitividade.

As Xornadas diríxense a empresas interesadas en iniciar, ou que iniciaran xa, un proceso de dixitalización, e coas que R compartirá experiencias e casos reais de compañías que afrontaron con éxito os novos retos de negocio motivados pola disrupción tecnolóxica.

Nuria Oliver, enxeñeira de Telecomunicación, doutora polo Media Lab do Instituto Tecnolóxico de Massachusetts (MIT), investigadora, divulgadora científico-tecnolóxica e recoñecida experta en Intelixencia Artificial e Big Data, impartirá unha conferencia para abrir a xornada, na que reflexionará sobre as claves estratéxicas do novo escenario dixital que se abre no mundo hiperconectado, volátil e cambiante no que vivimos e no que temos máis solucións tecnolóxicas que nunca. Explicará como desenvolver unha correcta estratexia de xestión do dato e que tecnoloxías están a empregar as empresas para obter novos modelos de negocio, para converterse en empresas dixitais, máis áxiles e con maior grao de automatización. Abordará o estado da Intelixencia Artificial, unha realidade que hai que aproveitar e pola que hai que apostar de xeito claro.

E, nesta aposta, R está claramente aliñada. Proba diso foi a creación este ano dunha unidade específica, BAI Analytics, co fin de aproveitar todas as capacidades que achega o Machine Learning, tanto internamente como para axudar ás empresas clientes a incorporar de xeito áxil e fácil todos os beneficios que achega esta tecnoloxía.

Os datos e o seu aproveitamento

A cita tecnolóxica terá como punto de partida o contexto tecnolóxico actual, no que os datos se converteron xa no activo máis importante das empresas e son a clave na estratexia de dixitalización para adaptarse á nova realidade dixital. A adopción adecuada das denominadas tecnoloxías habilitadoras como Big Data, Internet of Things e, por suposto, a Intelixencia Artificial, van ser necesarias no tratamento e aproveitamento dos datos e, polo tanto, no éxito e supervivencia das empresas. Estas tecnoloxías son xa unha realidade. Neste sentido, as empresas atopáronse co desafío de dispor das plataformas, a tecnoloxía, o coñecemento e a experiencia de persoal experto altamente cualificado que lles permitan xestionar esa inxesta exponencial de datos e a capacidade de cómputo necesaria.

Nas Xornadas presentaranse, por unha banda, experiencias reais da man de empresas como eBroker, o Grupo Cuevas ou o Grupo Euskaltel, a través de Bai Analytics, onde o seu responsable, Ignacio Vilaplana, explicará como o dato pode ser unha panca de crecemento para as empresas e cales son os beneficios da Intelixencia Artificial. E, doutra banda, mostraranse as claves do éxito da xestión dos datos e como aplicar a IA na empresa da man dos nosos expertos DataRobot e Datu(a).

Acompañamento e proximidade

Neste sentido, R xa está a ter un papel relevante e referente, pois está a apostar non só polos últimos servizos de telecomunicacións, senón que vai máis aló, aproveitando as capacidades para acompañar as empresas clientes mediante servizos de IoT, Big Data ou Intelixencia Artificial, en alianza coas empresas especializadas de cada sector.

Para Isidro Fernández de la Calle, director corporativo de Empresas de R e do Grupo Euskaltel, as Xornadas Tecnolóxicas R son un punto de encontro coas empresas “co que tomamos o pulso do estado da tecnoloxía nas compañías, co obxectivo de poder atender de forma máis certeira e próxima os seus requirimentos e necesidades neste ámbito. A empresa adaptada á nova realidade require dun acompañamento experto que lle axude a afrontar os retos con solucións reais. R traballa moi de preto coas empresas, a carón delas, apostando polas últimas tecnoloxías, aproveitando as capacidades dos seus centros de datos para ofrecer plataformas IoT e Big Data en modo servizo e, en relación á Intelixencia Artificial, creando BAI Analytics”.

Plataforma virtual a un clic de distancia

A imposibilidade de celebrar de forma presencial esta edición das Xornadas Tecnolóxicas R obrigou a buscar novos escenarios online. Por iso, este ano os asistentes vivirán unha Tech Experience virtual especificamente creada para este evento.

Utilizando a tecnoloxía como aliada, R conseguiu que as e os asistentes ás Xornadas Tecnolóxicas poidan percibilas como se estivesen de verdade nelas, reproducindo a realidade dun edificio con auditorio, salas de conferencias, salas para networking e amplos espazos expositores, só con premer en cada sección.

Trátase dun edificio virtual onde se poderán seguir os relatorios, acudir aos espazos de demostracións tecnolóxicas ou escoitar e participar activamente nos relatorios e charlas temáticas. Tamén haberá un espazo onde visitar os postos das principais empresas do sector que colaboran no evento: Cinfo, Cisco, Citrix, DataRobot, Flame Analytics, Fortinet, HSI, Merkatu, Microsoft, Panda, Plexus, S21, Shooowit ou VMWare, entre outros.

R, 2020-10-26

Actualidad

Foto del resto de noticias (festival.jpg) O ciclo 'Primeira Fila' fomentará a visibilidade de novos talentos musicais, impulsado pola Fábrica de Chocolate co obxectivo de apoiar a proxección de artistas e bandas e facilitar o seu encontro co público nas salas de concertos de Galicia. O ciclo, que arrincou en maio e xa percorreu as salas de Melide e Santiago de Compostela, continuará en xaneiro con sete novas propostas. A actividade retomarase o 21 de xaneiro en La Conservera, (Viveiro), con 9Louro e Monoulious DOP. No mesmo espazo actuarán Eladio y los Seres Queridos e Capital Voskov, o 13 de febreiro, así como Marisa Valle Roso, o día 20. O 20 de febreiro Taïn ofrecerá un concerto na Sala Jagger, en Lugo, mentres que Santi Araújo estará o 27 de febreiro na Sala Arca de Noé, en Vilar de Santos.
Foto de la tercera plana (universidade-estudante.jpg) O conselleiro de Sanidade, Antonio Gómez Caamaño, e a reitora da Universidade de Santiago de Compostela, Rosa Crujeiras, o reitor da Universidade da Coruña, Ricardo Cao, e a reitora da Universidade de Vigo, Carmen García Mateo, asinaron hoxe un convenio de colaboración para reforzar o acompañamento psicolóxico aos estudantes. Este acordo, dotado con 60.000 euros, dá continuidade ao xa asinado en 2025, un ano no que se os dispositivos de acompañamento psicolóxico das universidades públicas galegas atenderon 370 alumnos.

Notas

O Instituto de Investigación en Saúde Global e Desenvolvemento Sostible da USC acollerá o vindeiro venres o encontro anual da Rede Artigo9Tech, unha iniciativa que promove a aplicación do coñecemento científico e tecnolóxico ao ben común e á cooperación para o desenvolvemento, e que reúne profesionais da USC, a UDC e a UVigo,e a diversas entidades sociais, como Enxeñaría Sen Fronteiras Galicia.
O proxecto europeo Marinnonet, liderado polo Centro de Investigación Mariña da UVigo no marco do programa Interreg Atlantic Area, chega ao seu fin tras tres anos de traballo con resultados que contribúen a fortalecer o sector da biotecnoloxía azul no espazo atlántico. Os socios participaron na xuntanza final e, entre os principais logros, destacaron a creación dunha rede transnacional de cooperación científica e empresarial.
PUBLICIDAD
ACTUALIDAD GALICIADIGITAL
Blog de GaliciaDigital
HOMENAXES EGERIA
PUBLICACIONES