miércoles, 2 de julio de 2025
A Deputación da Coruña rematou a redacción do proxectos dos distintos tramos da Vía Verde Cerceda-Santiago e xa conta coa cesión do terreos por parte de ADIF e coas autorizacións necesarias para poder licitar as obras, que suporán un importante investimento de preto de 2,4 millóns de euros, dos que 1.860.501 serán financiados con fondos europeos FEDER para proxectos de fomento da mobilidade sostible e a economía baixa en carbono e outros 535.129 con fondos propios da Deputación.
Así o confirmou o presidente da institución provincial, Valentín González Formoso, durante a visita oficial que hoxe realizou ao municipio de Cerceda, na que estivo acompañado polo novo alcalde da localidade, Juan Manuel Rodríguez, e polos deputados provinciais, José Manuel Pequeño, José Manuel Lage Tuñas e Cristina Capelán Cancelo.
González Formoso sostivo que a Vía Verde, unha idea ambiciosa que comezou a xestarse hai máis dunha década, será unha realidade durante o presente mandato grazas ao traballo conxunto da Deputación e dos cinco concellos implicados no proxecto: Cerceda, Tordoia, Ordes, Oroso e Santiago de Compostela e afirmou que, tras a aprobación definitiva dos proxectos nos plenos destes concellos, a Deputación comezará o proceso de licitación das obras.
Será a primeira Vía Verde da provincia da Coruña e a de maior extensión de Galicia, cun itinerario de 36,5 quilómetros sobre as antigas vías do ferrocarril (catro veces máis que a Vía Verde do Salnés) que permitirá camiñar ou andar en bici desde o núcleo urbano de Cerceda ata a estación da Sionlla de Santiago, atravesando espazos de gran interese medioambiental, histórico e cultural.
Ademais de servir como elemento de vertebración do territorio, recuperando a rede ferroviaria abandonada para darlle unha nova dimensión máis ecolóxica e sostibe, a Vía Verde terá unha importante repercusión turística e socioeconómica para Cerceda e para o resto dos concellos polos que discorre, afirmou González Formoso.
Neste aspecto inicidiu tamén o alcalde de Cerceda, Juan Manuel Rodríguez, que considerou que o proxecto dará un impulso importante ao rural e ao turismo no municipio.
O presidente apuntou que a Vía Verde Santiago-Cerceda enmárcase na aposta do Goberno provincial pola promoción de novos modelos de mobilidade sostible con proxectos como a ampliación da Rede Ciclista Metropolitana da Coruña ou as Sendas do Faros, que tamén contan con axudas europeas para a súa creación.
Dos 36,5 quilómetros da Vía Verde, 5,5 quilómetros corresponden ao termo municipal de Cerceda, 2,48 a Tordoia, 8,3 a Ordes, 7,19 a Oroso e 13 a Santiago de Compostela.
Mellora de infraestruturas e servizos públicos en Cerceda
O presidente da Deputación destacou tamén a contribución da Deputación á mellora das infraestruturas e servizos públicos en Cerceda, con achegas cercanas aos 6 millóns de euros nos últimos anos. Un récord de investimento no que tivo moito que ver a creación do Plan Único, que permitiu mellorar numerosos camiños e estradas municipais, construír beirrarúas ou redes de saneamento.
González Formoso ofreceu ao novo rexedor, Juan Manuel Rodríguez, que vén de substituír a José García Liñares tras 25 anos á fronte do goberno municipal, o apoio e a colaboración da Deputación para seguir mellorando a calidade de vida dos veciños e veciñas da localidade e desexoulle os maiores éxitos na súa xestión municipal.
Tamén lembrou que Cerceda é unha das localidades afectadas polo proceso de descarbonización e apuntou que a Deputación será sensible neste ámbito.
Melloras da seguridade vial
O presidente provincial e o alcalde visitaron tamén durante a xornada de hoxe a estrada provincial DP 2402 de Cerceda a Xesteda, na que a Deputación vén de rematar as obras de mellora do firme primeiros 2,9 quilómetros do vial cun investimento cercano aos 300.000 euros.
González Formoso afirmou que, tras completar as expropiacións, o goberno provincial ten previsto aprobar definitivamente no pleno de marzo as obras de mellora do trazado desta mesma estrada entre os PK 4+680 e 4+925, cun orzamento de 166.095 euros, que permitirá corrixir as perigosas curvas existentes na zona e modificar a intersección coa estrada municipal que dá acceso a Ubal, onde se executará un carril central de espera que contribuirá a mellorar a seguridade na zona.
O alcalde solicitou tamén o apoio da Deputación para a mellora doutro tramo de curvas na mesma estrada, entre Bós Aires e Pau do Lobo á altura do cruce de A Lagoa.
O presidente, o alcalde e os deputados visitaron tamén durante a xornada da hoxe a sede de Elis Manomatic, unha empresa de lavandería industrial situada no polígono industrial de Acebedo que da servizo a hoteis, establecementos hosteleiros e sanitarios e que da emprego a máis de 90 persoas nos meses de maior carga de traballo.
O presidente da Xunta, Alfonso Rueda, resaltou hoxe que Galicia asumirá desde mañá 'a plena xestión sobre o seu litoral', un 'feito histórico desde o punto de vista do autogoberno' que virá acompañado da posta en marcha de xeito inmediato de dous novos servizos, unha nova canle de información á cidadanía e a posibilidade de unificar nun só formulario calquera trámite ou solicitude sobre o litoral. Deste xeito, o Goberno autonómico prepárase para asumir o autogoberno pleno do litoral co traspaso efectivo a Galicia a partir de mañá das funcións, medios e servizos en materia de ordenación costeira.
A primeira fase do piloto do proxecto Xenoma Galicia permitiu detectar, entre os máis de 1.000 participantes aos que se lle recolleu unha mostra de sangue, 14 novos casos de alto risco para as patoloxías investigadas de cancro de mama e ovario hereditario, síndrome de Lynch e hipercolesterolemia familiar. A Consellería de Sanidade presentou esta mañá ante o Consello da Xunta un informe de situación do piloto do proxecto Xenoma Galicia. Cun investimento de 20 millóns de euros, o Goberno galego márcase o obxectivo de recompilar o ADN de 400.000 persoas. Pola porcentaxe de poboación incluída, Xenoma Galicia é un dos proxectos de maior envergadura do mundo. Permitirá ofrecer tratamentos farmacolóxicos individualizados, predicir o risco de enfermidades antes de apareceren para poder anticiparse a elas e evitalas grazas ao estudo do xenoma e da historia clínica.
