lunes, 4 de mayo de 2026
O programa 'ALT Procrea en Feminino 2017' de apoio e acompañamento para creadoras galegas no seu proceso creativo ofrecerá a estrea absoluta da peza de Begoña Cuquejo Bailarina hipnótica e a presentación do traballo no que se basea: Bailarina, da coreógrafa catalá Sonia Gómez.
As dúas artistas participaron na rolda de prensa na que se deu a coñecer o programa, que se celebra do 10 ao 12 de marzo en Vigo co apoio da Consellería de Cultura, Educación e Ordenación Universitaria. Durante a presentación, o secretario xeral de Cultura, Anxo Lorenzo, asegurou que o da cultura constitúe un ámbito fundamental de promoción a prol da igualdade de oportunidades entre homes e mulleres, nomeadamente o sector das artes escénicas, que ten no Festival ALT un escaparate de referencia.
Unha plataforma para a difusión artística
No acto, no que tamén participou o delegado da Xunta de Galicia en Vigo, Ignacio López-Chaves, Anxo Lorenzo destacou o labor impulsado por ALT Procrea para poñer en valor o talento creativo das artistas que participan neste singular programa de apoio e de acompañamento para creadoras galegas en todas as etapas do seu proceso creativo.
Con este obxectivo, o programa vén poñendo ao dispor das participantes materiais para facilitar o desenvolvemento dos seus traballos, vén ofrecendo asesoramento para axudar na materialización das súas propostas e tamén vén poñendo ao seu dispor plataformas de creación e de difusión que lles permitan dar a coñecer os seus proxectos tanto dentro como fóra do noso territorio, afirmou Anxo Lorenzo, ao tempo que se referiu á oportunidade que brinda este programa para o intercambio cultural entre as propostas escénicas que se están a xestar en Galicia e as que se están a desenvolver noutros puntos do Estado.
Inmersión e transmisión coreográfica
A rolda de prensa, na que tamén participaron Lola Correa, directora do festival ALT, xunto con Anabel González Penín, directora da Unidade de Igualdade da UVigo, que tamén colabora co programa, e a artista canaria Celeste González, tivo lugar no MARCO de Vigo, onde a bailarina e coreógrafa catalá Sonia Gómez presentará mañá, 10 de marzo, ás 19:00 horas, o seu traballo Bailarina, ao que seguirá a estrea da peza Bailarina Hipnótica, de Begoña Cuquejo. O proxecto da artista galega é o resultado dun traballo de inmersión e de transmisión coreográfica baseado na peza de Sonia Gómez, quen foi acompañando o proceso creativo de Cuquejo ao longo de medio ano.
O programa tamén presentará no MARCO, o día 11, ás 20:00 horas, a peza Sujeto visible sujeto invisible, na que a creadora Masu Fajardo constrúe unha metáfora baseada na dualidade do visible e do invisible. Ao día seguinte será a quenda da artista Celeste González co encontro de pensamento arredor da danza e do cine Weakfield Poole: visiones y revisiones.
A través da Secretaría Xeral de Cultura e da Axencia Galega das Industrias Culturais, a Consellería de Cultura e Educación colabora co festival ALT, na que será a súa última edición segundo anunciaron os organizadores, e na que tamén contará co espectáculo de Matarile Teatro Antes de la metralla e co espazo gastronómico La cuina furtiva.
CiberLabFP configúrase como un espazo de aprendizaxe, experimentación e desenvolvemento de competencias en contornos reais que integran tecnoloxías da información (IT) e de operación (OT) para así adaptar a Formación Profesional aos novos escenarios de transformación dixital. Entre as súas funcionalidades destacan a formación especializada do profesorado, a simulación de ciberataques e defensa en contornos virtuais, a análise forense industrial ou a validación de sistemas. Ademais, contará cunha estación móbil que permitirá levar a tecnoloxía a centros educativos e realizar demostracións en empresas e feiras.
Celebrouse hoxe a sesión constitutiva do Foro do Litoral de Galicia, que será o máximo órgano colexiado de consulta e participación do conxunto da sociedade co fin de optimizar a xestión e ordenación da costa galega. Nel están representadas a Administración autonómica e as locais así como os sectores social, científico, económico e medioambiental e as entidades implicadas na protección do patrimonio natural co fin último de garantir unha gobernanza que permita unha participación suficiente de todos os sectores da sociedade interesados no litoral. A constitución do foro facilitará a partir de agora facer un seguimento das normas, políticas e instrumentos do litoral.
