jueves, 22 de octubre de 2026
Rodrigo García, autor de obras irreverentes e textos que estalan como bombas, é o encargado de pechar o mércores, 15 de febreiro, Escenas do Cambio. Festival de Inverno de Teatro, Danza e Arte en Acción da Cidade da Cultura. Será cunha das súas obras cumio: Muerte y reencarnación en un cowboy, ás 20:30 horas no Museo Centro Gaiás.
Tras quince días coas propostas máis actuais do teatro contemporáneo, Escenas do Cambio despídese cun dos grandes nomes da nova escena. Creador atípico que conxuga nos seus espectáculos elementos do pasado e da cultura popular de hoxe, Rodrigo García elabora xunto a súa compañía La Carnicería Teatro unha linguaxe teatral sorprendente que recolle as ideas e as emocións que axitan á nova xeración teatral.
En Muerte y reencarnación en un cowboy, Rodrigo García presenta o desafío de vivir no abismo de cada instante. Once anos despois de presentar Accidens na Sala Nasa, Rodrigo volve a Santiago con este traballo corrosivo e de marcado acento propio. As entradas para este último espectáculo de Escenas do Cambio están dispoñibles na billeteira do Museo Centro Gaiás ou por venda electrónica en ataquilla.com.
Quince días de escena contemporánea
Con Muerte y reencarnación en un cowboy ponse fin a un programa que constou de 25 pezas de artistas e compañías de 10 países diferentes, e na que o teatro galego tivo unha presenza destacada con nomes como Chévere, Matarile Teatro ou iLMaquinario, entre outros nomes.
A ollada á escena galega conviviu nesta terceira edición de Escenas do Cambio coa atención ao teatro contemporáneo de América Latina, con propostas de nomes imprescindibles como Federico León, Rodrigo García, Guillermo Calderón, Mariano Pensotti, Manuela Infante ou Magdalena Arau. Xunto a estas montaxes, Escenas do Cambio avanzou na súa vocación de traer a Galicia proxectos dalgunhas das compañías máis inquedas do panorama internacional, como o colectivo BERLIN, ou os proxectos de Ant Hampton e Tim Etchells, Takao Kawaguchi ou Trajal Harrell.
O proxecto Lugopoética dá un novo paso na difusión da poesía galega coa publicación do libro Lugopoética 2026, unha obra que recolle a creación e as reflexións de doce poetas participantes na terceira edición deste ciclo literario, desenvolvido na sede da UNED de Lugo durante o primeiro semestre do ano. A publicación reúne os contidos dun programa que busca achegar a poesía á cidadanía, favorecer o encontro entre autores e lectores e contribuír á difusión da literatura en lingua galega. A iniciativa consolídase así como un espazo de diálogo arredor da palabra poética, no que conviven traxectorias consolidadas e novas voces da creación literaria.
O presidente da Xunta, Alfonso Rueda, informou de que o Consello aprobou hoxe a Estratexia Galega de Innovación Empresarial, 'con horizonte 2028 e dotada de máis de 400 millóns de euros'. O obxectivo é apoiar ao tecido produtivo para que 'a innovación forme cada día máis parte das empresas', algo fundamental para 'ser máis competitivos e non quedar atrás' nun mundo cada vez máis global e tecnolóxico. Baixo o nome Galicia, fábrica de Innovación, a nosa Comunidade contará por primeira vez cunha estratexia específica para a innovación, un conxunto de medidas cun marco común para coordinar e reforzar os instrumentos de apoio existentes e incorporar outros cunha prioridade: industrializar a innovación.
