miércoles, 29 de abril de 2026
A Consellería de Medio Ambiente e Ordenación do Territorio vén de modificar a páxina web de Meteogalicia (www.meteogalicia.gal) para incluír novos contidos que melloren a información meteorolóxica e climática que ofrece.
A principal novidade é o novo apartado que contén o resumo dos valores extremos observados na velocidade do vento, precipitación, e temperatura máxima e mínima. A información estará dispoñible tanto para o día en curso como para a xornada anterior, e organizarase en dous bloques: un para as estacións situadas por debaixo dos 900 metros altitude do 90% do territorio galego-; e outro para aquelas ubicadas por riba desta altura.
Ademais do novo apartado, a páxina de inicio mostrará tamén un resumo destes valores e, entre o ocaso e o orto, o carrusel de imaxes de cámaras web será substituído por unha animación con mapas de Galicia que incluirán a interpolación desas variables extremas.
Outro apartado que se modifica é o de observación. Entre outros cambios, pasa a incluír tamén o resumo de valores extremos e a animación do mapa de Galicia, como na páxina de inicio; e amosará un carrusel das cámaras web e un listado cos últimos informes climatolóxicos dispoñibles.
Cabe destacar, ademais, que no apartado de cámaras habilitarase unha opción para visualizar a animación do día en curso e do anterior, e incluirase un enlace a unha imaxe coa vista que abarca a cámara.
Foron presentadas as xornadas Galicia Biodays, que buscan posicionar Galicia como un territorio de referencia en innovación biotecnolóxica no ámbito internacional. Este evento vaise celebrar os días 6 e 7 de maio no Auditorio Mar de Vigo, e permitirá reforzar a marca Galicia Calidade en biotecnoloxía, fomentar o intercambio de coñecemento e establecer novas colaboracións científicas, empresariais e institucionais. Está previsto que asistan máis de 1000 persoas de 9 biorrexións convidadas, con máis de 130 relatores.
Alfonso Rueda informou de que o Consello deu conta do inicio da tramitación do anteproxecto da que será 'a primeira Lei do terceiro sector da acción social de Galicia'. Unha norma que busca 'unificar nun único texto legal a regulación deste eido e recoñecer de xeito formal o seu traballo e o papel que xogan as entidades na sociedade galega'. A necesidade de aprobar esta lei xustifícase na importante presenza destas entidades en Galicia, preto de 1.500, -que constitúen 'unha auténtica rede de solidariedade', segundo resaltou a conselleira de Política Social e Igualdade, Fabiola García-, para apoiar as persoas e fogares máis vulnerables.
