sábado, 2 de mayo de 2026
O programa de dinamización lingüística O galego é un mundo: multiculturalismo e diversidade lingüística hoxe, da Secretaría Xeral de Política Lingüística, botou a andar cunha xornada informativa para profesorado pertencente a equipos de dinamización da lingua galega celebrada no salón de actos do Pazo de San Roque.
O titular de Política Lingüística da Xunta, Valentín García, ocupouse da sesión de apertura cunha intervención na que destacou o feito de que, en contra do que tendemos a pensar, o monolingüismo non é a norma da que os galegos nos saímos, senón que entre a metade e dous terzos da poboación mundial fala máis dunha lingua. García Gómez insistiu na importancia de conseguir que as novas xeracións saiban apreciar o valor desta diversidade idiomática á que Galicia contribúe co seu idioma propio.
Na presentación de O galego é un mundo, o secretario xeral estivo acompañado por Sabela Gil, coordinadora central dos equipos de dinamización da lingua galega; por Anik Nandi, sociolingüista bengalí que desenvolverá o programa e que foi o encargado de expoñerlle ao profesorado os detalles relativos aos seus obxectivos e contidos; por Manuel Núñez Singala, xefe do Servizo de Normalización Lingüística da Universidade de Santiago, que falou do Papel da sociedade na modificación das condutas lingüísticas; por Xurxo Salgado, director do xornal dixital Galicia Confidencial, que se ocupou da Visibilización dos programas de multiculturalidade nos medios e das súas repercusións na sociedade global, e por Brais Fernández, dinamizador sociocultural e lingúístico integrante do dúo Consello de Galegos Ilustres, que desenvolveu, xunto con Nandi, o recital Poesía galega en bengalí.
O programa O galego é un mundo, que leva adiante por primeira vez a Secretaría Xeral de Política Lingüística en colaboración cos equipos de dinamización da lingua galega de 12 centros educativos de ensino secundario, persegue fomentar a consciencia da diversidade lingüística e do muticulturalismo e contribuír a erradicar os prexuízos existentes a respecto do galego. Articúlase nunha serie de relatorios interactivos impartidos polo sociolingüista bengalí Anik Nandi, quen realizará unha análise contrastiva entre a realidade sociolingüística de Galicia e a da India.
Nesta primeira edición, O galego é un mundo chegará aos seguintes centros educativos: IES Félix Muriel (Rianxo), IES San Clemente (Santiago de Compostela), IES Carral, IES Manuel Murguía (Arteixo); IES Aquis Celenis (Caldas de Reis); IES Castro Alobre (Vilagarcía de Arousa); IES Carlos Casares (Vigo); IES Chano Piñeiro (Forcarei); IES Taboada Chivite (Verín); IES Cidade de Antioquía (Xinzo de Limia); CPI Plurilingüe Navia de Suarna e IES de Ribadeo Dionisio Gamallo.
CiberLabFP configúrase como un espazo de aprendizaxe, experimentación e desenvolvemento de competencias en contornos reais que integran tecnoloxías da información (IT) e de operación (OT) para así adaptar a Formación Profesional aos novos escenarios de transformación dixital. Entre as súas funcionalidades destacan a formación especializada do profesorado, a simulación de ciberataques e defensa en contornos virtuais, a análise forense industrial ou a validación de sistemas. Ademais, contará cunha estación móbil que permitirá levar a tecnoloxía a centros educativos e realizar demostracións en empresas e feiras.
Celebrouse hoxe a sesión constitutiva do Foro do Litoral de Galicia, que será o máximo órgano colexiado de consulta e participación do conxunto da sociedade co fin de optimizar a xestión e ordenación da costa galega. Nel están representadas a Administración autonómica e as locais así como os sectores social, científico, económico e medioambiental e as entidades implicadas na protección do patrimonio natural co fin último de garantir unha gobernanza que permita unha participación suficiente de todos os sectores da sociedade interesados no litoral. A constitución do foro facilitará a partir de agora facer un seguimento das normas, políticas e instrumentos do litoral.
