lunes, 2 de noviembre de 2026
Entre as pinturas, fotografías, esculturas, videocreacións e instalacións atópanse grandes nomes como Castelao, María Antonia Dans, Eugenio Granell, Laxeiro, Urbano Lugrís ou Seoane; artistas de recoñecida traxectoria como o premio nacional de fotografía Manuel Vilariño e a fotógrafa Mar Caldas, o escultor Manolo Paz, os pintores Antón Lamazares, Berta Cáccamo ou Menchu Lamas, e tamén representantes das xeracións máis novas como Diego Vites, Lois Patiño ou Noa e Lara Castro de Lema, entre outros moitos.
Seguindo os achados das investigacións en neuroestética e neuroarquitectura, As estacións do ano xoga coas cores, a disposición das pezas no Museo e a temperatura a través de dúas cabinas de inmersión, unha de frío e outra de calor para activar as emocións e focalizar a atención dos sentidos en cada obra de arte. Pode visitarse ata o vindeiro domingo, con entrada de balde, en horario de 10,00 a 20,00 horas.
Diálogo aberto sobre a arte do século XXI
O xoves 3 de setembro ás 18,00 horas está previsto, ademais, un diálogo aberto con tres artistas sen xeración definida presentes na mostra: Berio Molina, Sergio Marey e Mar Ramón Soriano. Neste encontro compartirán co público as súas inquedanzas e procesos, así como a súa perspectiva sobre a evolución da creación contemporánea en Galicia nos últimos 25 anos. Desde as reflexións sobre a globalización, as novas tecnoloxías e o mundo urbano ao xiro cara á tradición, á identidade e ao propio que deron moitos artistas arredor do ano 2010. Para asistir é necesario reservar praza, de maneira gratuíta na web da Cidade da Cultura.
Esta proposta encádrase na liña Gaiás inspira, que programou diferentes accións divulgativas, lúdicas e didácticas ao redor da exposición. Dentro delas, desenvolveuse un encontro con Edu Valiña e Mondra para afondar na instalación Esfollarse, unha das cinco pezas inéditas creadas de maneira específica para a mostra, e tamén as visitas especiais Segunda Pel, pensadas para amplificar a inmersión do público, ao vestir prendas monocromas iguais que camuflaban a súa presenza coas cores das paredes do Museo.
Estas actividades veñen a sumarse ás visitas guiadas regulares e tamén didácticas do Museo Centro Gaiás, destinadas ao alumnado dos centros galegos, nas que participaron máis de 1.400 persoas.
As estacións do ano é un dos grandes proxectos expositivos da Cidade da Cultura para o ano 2026 e unha das mostras de arte galega máis ambiciosas da última década. A súa realización foi posible grazas á xenerosidade dos artistas e á colaboración das coleccións de arte públicas e privadas máis destacadas de Galicia, coa Colección de Arte Afundación, a Colección de Arte ABANCA e o Museo de Belas Artes da Coruña á fronte. Tamén hai pezas procedentes das fundacións María José Jove, Luis Seoane e Eugenio Granell, así como do Centro Galego de Arte Contemporánea, os museos de Pontevedra e de Lugo, e as galerías Nordés e Trinta, entre outras.
Galicia ocupa un lugar destacado nos Premios Nacionais de Investigación 2026, con cinco científicos galardoados. Tivo lugar o acto de entrega destes premios, celebrado no Palacio de Congresos de Europa, en Vitoria-Gasteiz. Os investigadores galegos que recibiron esta distinción son Ángel Carracedo, natural de Santa Comba, catedrático de Medicina na USC e director da Fundación Pública Galega de Medicina Xenómica; a compostelana Carmen Álvarez Lorenzo, catedrática da USC e directora do Instituto de Materiais da USC (iMATUS); e Laura Castro Santos, de Betanzos, catedrática da Escola Politécnica de Enxeñaría de Ferrol, pertencente á UDC.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
