lunes, 2 de noviembre de 2026
A popularidade do xénero quedou patente tamén nos 2.300 asistentes que trouxo o Atardecer Fest, o 13 de agosto, nunha xornada protagonizada polo rap de Santa Salut e Israel B xunto a Silee, artista emerxente de Bueu que mestura este xénero co trap e con ritmos latinos e tradicionais.
Carlangas, quen inaugurou o ciclo o 2 de xullo, e o dúo de stoner rock Bala foron outros dos concertos que congregaron máis público, así como a sesión de electrónica en directo coa que Galician Army puxo a banda sonora a eclipse de sol da tarde do 12 de agosto.
Plataforma para o talento novo
Polo escenario de Atardecer no Gaiás pasaron tamén promesas da música galega como Marrit, primeiro premio Xuventude Crea 2025, na modalidade de Música, ou Dogo, gañadores o ano pasado do concurso Sonidos Mans Salas para bandas emerxentes.
O novo tradi estivo representado polos Unto Vello e polo trío Maricarme, propostas caracterizadas por recoller melodías do folclore e actualizalas a partir de novos arranxos e instrumentación contemporánea. Nesta mesma liña de experimentación, a partir da canción tradicional, encadrouse o concerto de Sheila Patricia.
Letras afiadas e punk rock desenfadado marcaron a actuación doutra banda emerxente na escena galega, Lisdexia, coa que se deu peche os concertos de xullo de Atardecer no Gaiás. Finalmente, o ritmo do último concerto desta décimo sexta edición do ciclo púxoo, o 14 de agosto, Turista Sueca, con temas de electropop para bailar e crítica social cargada de humor.
Atardecer no Gaiás é unha das máis de 3.600 propostas impulsadas polo Goberno galego dentro da campaña de verán Para gustos, cultura, que leva actividades de música, artes escénicas e exposicións a máis de 200 localidades galegas.
Galicia ocupa un lugar destacado nos Premios Nacionais de Investigación 2026, con cinco científicos galardoados. Tivo lugar o acto de entrega destes premios, celebrado no Palacio de Congresos de Europa, en Vitoria-Gasteiz. Os investigadores galegos que recibiron esta distinción son Ángel Carracedo, natural de Santa Comba, catedrático de Medicina na USC e director da Fundación Pública Galega de Medicina Xenómica; a compostelana Carmen Álvarez Lorenzo, catedrática da USC e directora do Instituto de Materiais da USC (iMATUS); e Laura Castro Santos, de Betanzos, catedrática da Escola Politécnica de Enxeñaría de Ferrol, pertencente á UDC.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
