lunes, 2 de noviembre de 2026
O comisario do Xacobeo 2027, Marcos Gómez Román, e a directora xeral de Xuventude, Lara Meneses, participaron na presentación do festival. Durante a súa intervención, Marcos Gómez Román destacou que Lingua Urbana exemplifica a capacidade dos Concertos do Xacobeo para incorporar novas linguaxes musicais e conectar con públicos diversos, especialmente coa mocidade. Neste sentido, salientou que a programación musical tamén é unha ferramenta para dinamizar as cidades e atraer visitantes, ofrecendo novas razóns para descubrir Santiago a través da música.
O representante da Xunta puxo tamén en valor a evolución da proposta e sinalou que iniciativas como Lingua Urbana contribúen a ampliar e diversificar a oferta musical de Galicia, dando espazo a artistas e estilos que forman parte das novas formas de consumo e creación musical. A cita intégrase así nunha programación dos Concertos do Xacobeo que este ano suma 80 eventos e festivais na provincia da Coruña, 22 deles na propia cidade de Santiago, reforzando a capacidade da música en directo para dinamizar cultural e turisticamente o territorio.
Pola súa banda, a directora xeral de Xuventude, Lara Meneses, considerou un orgullo configurar un festival cunha carteleira cun número tan significativo de artistas galegos emerxentes, que empregando a nosa lingua contan con milleiros de seguidores. Neste senso, a representante da Consellería de Cultura, Lingua e Xuventude salientou a contribución destes certames para dar a coñecer o talento e a creatividade da mocidade galega, e no noso idioma, que suma e dá aínda máis prestixio a esa Galicia Calidade da que tanto se fala dentro e fóra da nosa Comunidade.
Un cartel de referentes e talento galego
A terceira edición de Lingua Urbana contará con Yung Beef e Dirty Suc, dous dos nomes máis recoñecidos da escena urbana, aos que se suma Abhir, que ofrecerá en Santiago a súa única actuación en Galicia durante 2026.
A presenza galega terá un peso destacado no cartel coa participación de Arce, artista compostelán e unha das figuras de referencia da actual, xunto con 9Louro, Lg1do, Sote, Carlos Barral e Valesk8, que achegarán diferentes estilos e perspectivas á programación.
A combinación de artistas consolidados, novos proxectos e creadores vinculados á escena galega permite configurar unha proposta especialmente conectada coas novas xeracións e coas tendencias actuais da música urbana, ao tempo que dá visibilidade ao talento que se está a desenvolver no país.
Unha proposta con capacidade de convocatoria
A capacidade de convocatoria de Lingua Urbana quedou xa demostrada este ano coa celebración, o pasado mes de marzo, da súa segunda edición en Vigo, que reuniu preto de 4.000 asistentes no IFEVI. Esta resposta confirma o interese que espertan os novos sons urbanos entre o público galego e permite afrontar a cita de Santiago cunha expectativa positiva de participación.
Con esta terceira edición, Lingua Urbana afianza a súa presenza no calendario musical galego e a súa aposta por unha escena en constante evolución. A cita contribúe tamén a manter activa a programación cultural de Santiago durante o tramo final do verán, favorecendo a actividade vinculada ao ocio e ao turismo nunha das cidades galegas con maior capacidade de atracción de visitantes.
Os Concertos do Xacobeo, un mapa sonoro diverso e plural
A Xunta de Galicia continúa firme na súa aposta por situar a comunidade galega como destino turístico de grandes eventos musicais a través dos Concertos do Xacobeo, un programa amplo e plural impulsado por Turismo de Galicia que dá cobertura a todas as grandes e máis singulares citas e espectáculos musicais da comunidade.
Máis de 800 artistas internacionais, nacionais e galegos de todos os xéneros que pisan forte nas listas de escoitas de agora e de sempre visitarán os Concertos do Xacobeo neste 2026. A aposta pola calidade e a diversidade de gustos e estilos para diferentes xeracións de públicos constitúe un atractivo único do programa, que continúa con 12 meses de música en directo, favorecendo o turismo e a oferta cultural de xeito deslocalizado ao longo de todo o ano.
Galicia ocupa un lugar destacado nos Premios Nacionais de Investigación 2026, con cinco científicos galardoados. Tivo lugar o acto de entrega destes premios, celebrado no Palacio de Congresos de Europa, en Vitoria-Gasteiz. Os investigadores galegos que recibiron esta distinción son Ángel Carracedo, natural de Santa Comba, catedrático de Medicina na USC e director da Fundación Pública Galega de Medicina Xenómica; a compostelana Carmen Álvarez Lorenzo, catedrática da USC e directora do Instituto de Materiais da USC (iMATUS); e Laura Castro Santos, de Betanzos, catedrática da Escola Politécnica de Enxeñaría de Ferrol, pertencente á UDC.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
