martes, 4 de agosto de 2026
A conselleira de Medio Ambiente e Cambio Climático, Ángeles Vázquez, explicou hoxe que Galicia incorporará a intelixencia artificial para mellorar a predición de eventos meteorolóxicos adversos e para reforzar a adaptación da Comunidade ao cambio climático.
Durante a presentación desta iniciativa na sede de MeteoGalicia, Ángeles Vázquez incidiu en que o obxectivo deste novo modelo é dar resposta coa suficiente anticipación aos fenómenos meteorolóxicos que poidan afectar á saúde das persoas, como as vagas de calor, e á detección e extinción de incendios forestais.
Deste xeito, a través do programa PIMA Eventos Adversos, e cun investimento de máis de 450.000 euros, incorporaranse á extensa rede de observación de MeteoGalicia, un conxunto de sensores específicos para medir novas variables atmosféricas. Así, ademais dos modelos de previsión actuais, contarase con medidas reais sobre a estrutura vertical da atmosfera, cuxo coñecemento é fundamental, por exemplo, á hora de deseñar a mellor estratexia para a extinción dun incendio forestal.
Ademais, a aplicación de técnicas de intelixencia artificial permitirá o cruzamento de datos co que se obterá máis información sobre o comportamento de fenómenos como vagas de calor, inundacións, períodos de seca, etc. e, polo tanto, permitirá mellorar o sistema de alertas temperás. Tal e como explicou a conselleira, cando se produza algún fenómeno adverso estaremos en mellores condicións para actuar e adiantarnos á súa evolución.
A maiores, porase en marcha un espazo web no que se aglutinará toda a información meteorolóxica útil neste eido como datos de observación e modelos preditivos para mellorar a comunicación e a capacidade da cidadanía para acceder aos datos e interpretalos.
Cómpre lembrar que o pasado verán xa se actualizou a información pública sobre o índice de risco diario de incendios (IRDI), que pasou a incluír unha predición a tres días en vez de a un só, como se facía con anterioridade. Tamén se delimitaron os datos por concello, establecendo o mesmo nivel de risco en todo o municipio, evitando así posibles confusións e mellorando o sistema de predición.
O obxectivo do Goberno galego é avanzar nas alertas temperás de fenómenos derivados do cambio climático, afondar no coñecemento dos mesmos e sensibilizar e capacitar á cidadanía e ás administracións locais para responder de xeito axeitado ante estas situacións.
Galicia garante un ano máis de estabilidade e pona ao servizo da cidadanía, sendo a primeira comunidade en aprobar no Parlamento o teito de gasto non financeiro para 2027, que supera os 15.000 millóns para dar resposta ás prioridades dos galegos: o reforzo dos servizos públicos e a transformación do modelo produtivo, cunha aposta polo investimento en I+D+i e pola mellora da formación para impulsar o crecemento empresarial, ademais de mellorar o acceso á vivenda e garantir o mellor Xacobeo da historia. Durante a súa presentación no Parlamento, o conselleiro de Facenda e Administración Pública, Miguel Corgos, pediu a todos os grupos o seu apoio para un teito de gasto que esgota a capacidade máxima fixada pola regra de gasto e que consolida unha senda crecente dos orzamentos de Galicia.
O Instituto de Estudos e Desenvolvemento de Galicia (IDEGA) da USC presentou o 40º informe 'A Economía Galega', un estudo que realiza de maneira ininterrompida dende 1986. Os seus directores, Dolores Riveiro e Melchor Fernández, explicaron que o documento se pode resumir nunha 'evolución favorable na maior parte dos sectores de actividade, confirmando unha notable capacidade de adaptación nun contexto internacional complexo'.
