domingo, 8 de noviembre de 2026
Un dos obxectivos principais do proxecto Aeroganp, explican desde a súa organización, é a creación dunha rede transfronteiriza de cooperación na eurorrexión, reunindo aos principais actores interesados no sector espacial para promover a investigación e a innovación. Tamén busca implementar unha serie de demostradores que operen en ambos lados da fronteira, facilitando a transferencia de tecnoloxía aeroespacial á sociedade. Así mesmo, aspira a contribuír significativamente ao desenvolvemento e mellora das capacidades de investigación, innovación e transferencia tecnolóxica aeroespacial ao sector produtivo.
Espérase que os impactos do proxecto, lanzado a pasada semana na sede da Axencia Galega de Innovación en Santiago de Compostela, sexan significativos na eurorrexión Galicia-norte de Portugal, segundo explican as entidades promotoras. Así, sinalan, fortalecerá a cooperación transfronteiriza no sector aeroespacial, promovendo a innovación e o desenvolvemento tecnolóxico, e aumentará a transferencia de coñecemento desde a investigación básica no ámbito aeroespacial cara ás empresas circundantes. Aeroganp tamén quere contribuír ao crecemento de persoal investigador e tecnólogo altamente especializados en ambos os lados da fronteira, alcanzando a masa crítica necesaria para liderar proxectos de grande envergadura. A iniciativa, engaden, potenciará ademais o ecosistema de investigación, innovación e desenvolvemento como un atractivo para investimentos na rexión, fomentando o desenvolvemento económico e a retención do coñecemento tecnolóxico.
O cofinanciamento polo Fondo Europeo de Desenvolvemento Rexional (Feder) ao 75% dentro do programa POCTEP, sinalan desde Aeroganp, foi crucial para a realización das actividades planificadas, incluíndo o desenvolvemento dos demostradores, a creación da rede de cooperación e a investigación innovadora. Coas sinerxías xeradas, é posible que xurdan novos proxectos de cooperación no futuro. A creación dun ecosistema de investigación e innovación no sector aeroespacial pode atraer investimentos adicionais e fomentar colaboracións continuas, fortalecendo a rexión como un hub aeroespacial en Europa. Polo tanto, as perspectivas de proxectos futuros son prometedoras, conclúen.
Impulsar o potencial existente
Aeroganp foi impulsado no marco do Polo Aeroespacial de Galicia, a iniciativa estratéxica da Xunta de Galicia para o sector aeroespacial no segmento dos sistemas e vehículos non tripulados. O punto de partida foi a visita da Comisión de Coordinación e Desenvolvemento Rexional do Norte ao Centro de Investigación Aeroportada de Rozas, en Castro de Rei (Lugo), unha infraestrutura única para os axentes do sector polas súas instalacións e pola tecnoloxía e as condicións para a investigación e o desenvolvemento de proxectos e solucións que sitúa a Galicia á vangarda do sector en Europa.
A eurorrexión, lembran desde o proxecto, posúe un grande potencial neste campo. Así, lembran, a Universidade de Vigo e a Universidade do Minho contan con titulacións de Enxeñaría Aeroespacial nos seus respectivos campus de Ourense e Guimarães e xa tiñan experiencias previas de colaboración en investigación e innovación. Doutra banda, engaden, a recente creación do Instituto de Física e Ciencias Aeroespaciais (Ifcae) na UVigo marcou un punto crucial na actividade de investigación no campus de Ourense neste sector. Esta actividade académica sumouse a investimentos públicos como a aposta da Axencia Galega de Innovación da Xunta de Galicia co Polo Aeroespacial de Galicia e, xunto con outras accións desenvolvidas por diversos centros tecnolóxicos, constitúen a base para o desenvolvemento do proxecto Aeroganp.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
