jueves, 19 de marzo de 2026
A delegada territorial da Xunta en Ferrol, Martina Aneiros, participou esta mañá na tenda Waves Ferrol na presentación da cuarta edición do Nachiños Fest que terá lugar os días 8 e 9 de setembro no campo das Cabazas, en Covas, e que volve contar un ano máis co respaldo do Goberno galego a través de Turismo de Galicia.
Acompañada do alcalde da cidade, José Manuel Rey Varela, e de representantes da organización, Aneiros destacou o salto cualitativo do cartel deste ano con figuras internacionais como a banda londiniense Crystal Fighter que ofrecerá na cidade o seu único concerto en Galicia. Xunto a eles haberá outras caras coñecidas do panorama nacional como Alizzz, Cupido, Anabel Lee, Besmaya, Julia Nar ou Alison Darwin que compartirán escenario coas formacións galegas The Rapants, Galician Army e Berto.
O Nachiños Fest aporta unha oferta musical diferente á temporada estival en Ferrolterra, a música indie, que tan ben conxuga con elementos tan identificadores da nosa comarca como son o surf e a natureza, salientou a delegada territorial, e é precisamente esa oferta variada de diferentes estilos e para diferentes públicos o que pretendemos promover desde a Xunta de Galicia ano tras ano.
Martina Aneiros destacou o excepcional medio que festivais como o Nachiños supoñen á hora de difundir os atractivos turísticos, patrimoniais e gastronómicos cos que conta a Comunidade Autónoma, á vez que serven para atraer visitantes ás contornas onde se celebran e agradeceu o traballo dos promotores e organizadores deste evento musical pola súa contribución a poñer a cidade e Galicia á vangarda do panorama musical nacional e mesmo europeo.
O prezo das entradas, á venta a través da páxina oficial do festival, oscilan entre os 33 euros das entradas diarias e os 49,50 do abono de dúas xornadas. Ademais haberá dispoñible unha zona de acampada á que se poderá acceder por un custo de 22 euros por persoa por ámbolos dous días.
Publicada en 1603, a traxedia do príncipe de Dinamarca pisa agora o escenario do Centro Dramático Galego cunha versión que sitúa no presente os seus conflitos e as tensións da coñecida trama: Hamlet enfróntase á morte do pai, ao precipitado matrimonio da súa nai co seu tío e á aparición dun fantasma que lle esixe vinganza, nunha historia marcada pola traizón, o remorso e a procura de certezas nun mundo moralmente corrompido. Nesta nova montaxe constrúese ao longo de 130 minutos unha peza viva, accesible e tamén divertida, sen renunciar á profundidade do texto orixinal. A intención é ofrecer un espectáculo no que o público galego poida verse reflectido dalgún xeito, recoñecendo cuestións, contradicións e dilemas que tamén forman parte da nosa época.
A Real Academia Galega de Ciencias elixiu á oceanógrafa Aida Fernández Ríos (Vigo, 1947 - Moaña, 2015) como 'Científica Galega do Ano'. Foi unha investigadora de referencia internacional no estudo dos océanos, labor que exerceu desde o Instituto de Investigacións Mariñas de Vigo, pertencente ao CSIC. O investigador do Instituto José Luís Garrido, quen, ademais de traballar durante tres décadas con Aida Fernández Ríos mantivo con ela unha relación moi estreita, destaca o que el chama 'o efecto Aida': 'Tiña un carisma extraordinario e un encanto persoal tremendo'.
