lunes, 20 de abril de 2026
A Xunta de Galicia non discute o fondo da cuestión, a mellora da atención temperá en España, xa que o documento que se elaborou por un grupo de expertos é bo no seu contido, pero non está completo. Para o Executivo galego, trátase só dunha primeira parte da folla de ruta, un marco conceptual moi xenérico e pouco técnico, que non desenvolve os aspectos máis importantes como son: os criterios de detección comúns, un catálogo básico de servizos, os estándares de calidade, os sistemas de información e coordinación e o financiamento. En consecuencia, a Xunta está en contra de aprobar un traballo inacabado que podería responder a intereses electorais.
A Xunta remarca que o Goberno central coñece perfectamente que se atopan pendentes de formación de Goberno varias comunidades autónomas, estando ademais en curso unha convocatoria de eleccións xerais para o 23 de xullo que conformará un novo goberno, que é o que deberá implementar a nova folla de ruta para a atención temperá. A Xunta considera, pois que, dadas estas circunstancias, debería agardarse á conclusión de todos os traballos para aprobar este documento.
A Xunta lembra que, na primeira reunión do Consello Interterritorial do Sistema Nacional de Saúde na que participou o novo ministro de Sanidade, José Miñones dixo que, dado o momento no que había, de eleccións municipais, non consideraba adecuado tratar o principal problema da sanidade, como é a falta de médicos. En base a iso, a Xunta considera que, para aprobar o primeiro documento doutros cinco que hai que desenvolver para a mellora da atención temperá, nun momento no que hai eleccións xerais, semella moito máis apropiado agardar, que é o que hoxe pediu Galicia.
O FIV de Vilalba volverá reunir na localidade lucense unha programación destacada da escena independente e alternativa estatal, cun cartel no que figuran nomes como Carlos Ares, Alcalá Norte, La M.O.D.A. e Ángel Stanich, xunto a outras propostas moi presentes no panorama actual como Repion, Puño Dragón, Celia Becks, Futuro Alcalde, Grande Osso e Rapariga DJ. A boa resposta do público nas últimas semanas confirma, ademais, a gran acollida desta edición, coa previsión de que Vilalba volva encherse de ambiente festivalero a próxima fin de semana. A programación do FIV de Vilalba desenvolverase entre o Escenario Vibra Mahou, o Escenario #Fiver by Lactalis e a Zona DJ, consolidando un formato que combina os grandes concertos nocturnos coa actividade diúrna do sábado.
Galicia sitúase como a comunidade autónoma con menor porcentaxe de pacientes que agardan máis de 60 días por unha consulta co especialista. Así o referendan os datos publicados polo Ministerio de Sanidade sobre listas de espera no Sistema Nacional de Saúde a peche de 2025. Segundo os datos, en decembro de 2025 a comunidade galega situouse como a cuarta rexión española con mellores tempos medios de espera no ámbito das primeiras consultas. Neste eido, o Servizo Galego de Saúde rexistrou unha media de 63 días de espera, fronte aos 102 do Sistema Nacional de Saúde. Estas cifras reflicten que os galegos esperan 39 días menos para acceder a unha consulta co especialista que a media dos españois.
