martes, 23 de diciembre de 2025
O director xeral de Cultura, Anxo M. Lorenzo, participou esta tarde na xornada Accesibilidade en espazos culturais, que se celebrou na Biblioteca de Galicia da Cidade da Cultura para presentar os resultados do proxecto Europeo Erasmus+ ALLURE. Nesta cita, o representante da Consellería de Cultura, Educación, FP e Universidades estivo acompañado da xefa do Servizo de Coordinación Estratéxica e Innovación da Consellería, Fátima García.
Durante a súa intervención, Anxo M. Lorenzo fixo un chamamento para seguir tecendo redes de colaboración e avanzar xuntos cara a unha cultura que sexa cada vez máis diversa. As nosas institucións culturais veñen traballando desde hai tempo desde a cooperación con organismos, asociacións, persoas usuarias e centros de formación para reflexionar, enriquecernos e avanzar xuntos, afirmou o director xeral de Cultura.
Froito desta colaboración con diferentes sectores, tal e como engadiu, a Xunta de Galicia avanza na futura Lei de Cultura Inclusiva e Accesible, unha normativa pioneira en España cuxo anteproxecto está actualmente na fase final de tramitación. Os intereses e principios que guían este proxecto van na liña do noso traballo e estamos seguros de que nos permitirá establecer novos contactos e conseguir unha maior dimensión europea, salientou.
O proxecto europeo Erasmus+ ALLURE, posto en marcha hai máis de dous anos co obxectivo de impulsar a accesibilidade cultural como medio de aprendizaxe de coñecementos e valores nas persoas adultas, conclúe tras un intenso traballo de avaliación dos recursos culturais. Así, entre os resultados recollidos no libro publicado coas conclusións da iniciativa inclúese a necesidade de seguir traballando para lograr unha inclusión real, tal e como explicou Fátima García.
Na publicación presentada hoxe tamén figura unha descrición da aplicación CIMA, explicada por Enrique Costa, profesor da EE Telecomunicación da Universidade de Vigo e investigador de AtlanTTIC no grupo GTI. Trátase do primeiro recurso impulsado ao abeiro deste proxecto que, coa colaboración da Universidade de Vigo, permite transformar información sobre eventos culturais para facela máis accesible a todos os colectivos creando folletos baseados en textos sinxelos e pictogramas.
Outra das ferramentas que forman parte do proxecto ALLURE é a metodoloxía de Design Thinking, na que afondou o catedrático da Universidade de Vigo Íñigo Cuiñas, que participa nesta iniciativa europea cunha experiencia do emprego desta metodoloxía en espazos culturais.
Países socios
O proxecto europeo Erasmus+ ALLURE conta como países socios con Islandia (Centro Textil de Blönduósi), Portugal (Asociación Empresarial de Portugal), Polonia (Talleres culturais de Lublin) e España (Grupo de Tecnoloxías da Información da Universidade de Vigo e a Consellería de Cultura, Educación, Formación Profesional e Universidade).
Todos eles son coordinados pola Xunta de Galicia como socio líder e co obxectivo de elaborar diferentes ferramentas que ofrezan unha experiencia inclusiva nos recursos e eventos culturais de maneira sinxela, rápida e personalizada para garantir unha cultura inclusiva e accesible desde a educación non formal.
O programa Radio na Biblio, que vai polo noveno ano en funcionamento, chega este curso a 245 centros de ensino que contan cun laboratorio de radio no que traballan as competencias vencelladas á alfabetización mediática, lingüísticas ou de expresión escrita e oral, entre outros. Con nove cursos en marcha, trátase dun programa consolidado que aproveita a posta en marcha dunha emisora de radio na biblioteca para traballar habilidades e destrezas e que permite o tratamento de contidos curriculares mediante metodoloxías activas e innovadoras que facilitan a aprendizaxe. Ademais, as actuais tecnoloxías da información e da comunicación facilitan o uso da radio como ferramenta pedagóxica de gran alcance para a difusión dos proxectos e iniciativas do centro educativo.
Tivo lugar a na cerimonia de entrega dos XVIII Premios Nacionais de Artesanía 2025, na que resultaron premiadas dúas candidaturas galegas. O artesán Aitor Martínez López de Arbina (Tomiño), especializado en tornería de madeira, resultou gañador na categoría Produto e a Fundación Artesanía de Galicia obtivo o recoñecemento na categoría Promociona para Entidades Públicas polo seu proxecto 'Artesanía no Prato'.
