martes, 1 de julio de 2025
Neste senso, apuntou que no eido da Intelixencia Artificial estanse a incorporar técnicas de maching learning e deep learning co ánimo de optimizar os diagnósticos dos cribados de cancro de mamá e colon.
Do mesmo xeito, tamén avanzou que xa se iniciaron dous proxectos vencellados aos cribados dos cancro de pulmón e de próstata, nos que, por medio do emprego de algoritmos, se procurará estratificar o risco que posúen os pacientes, para poder priorizar a realización de cribados mediante a información que se desprende destes datos.
O noso obxectivo coa dixitalización non é simplemente dispor dun rexistro ou un sistema de información, senón ir un paso máis alá, destacando que a Xunta pretende avanzar dun modelo que ademais de contar o que xa ocorreu tamén advirta que é o que vai acontecer.
Pola súa banda, abundou Durán, a Consellería de Sanidade empregará o Big Data nunha nova liña de traballo que pretende establecer patróns que axuden tanto á vixilancia epidemiolóxica, como á identificación de factores que predispoñan a padecer unha enfermidade.
Ademais, a incorporación da tecnoloxía aos cribados posibilitou a implantación efectiva do cribado poboacional oportunista para a hepatite C, engadindo, de xeito automático, a solicitude da seroloxía deste virus nas analíticas de rutina feitas na poboación diana, o que facilita a súa petición. Así, nos primeiros cinco meses da posta en marcha deste cribado, fomos capaces de realizar 23.700 probas de hepatite C, obtendo un total de 27 positivos.
Plataforma Sanidade Mediaverso
A directora xeral de Saúde Pública explicou polo miúdo o conxunto programas e proxectos que artellou nos últimos tres anos o seu departamento, no eido da transformación dixital sanitaria.
Sobre este particular, remarcou que a finais deste ano estará rematada a Plataforma Sanidade Mediaverso. Un proxecto de contidos dixitais multitecnolóxicos que, inserido nos programas Obesidade Zero e Inspira Saúde, agrupará contidos relacionados cos estilos de vida saudable.
A plataforma incorporará planificacións para levar a cabo unha alimentación equilibrada ou xogos de realidade aumentada que promoveran o exercicio físico entre nenos e maiores. Entre estes últimos, destaca un aplicativo que permitirá trasladar os pasos diarios de cada usuario ás etapas do Camiño de Santiago -achegando información sobre os destinos que vaia acadando-; e tamén unha aplicación a través de lentes de realidade virtual, nas que as persoas maiores aprenderán a desenvolver un programa de actividade física multicompoñente, para a prevención da fraxilidade.
Así mesmo, Sanidade Metaverso completarase con contidos vencellados a hixiene do sono, o benestar emocional ou prevención de condutas adictivas entre a poboación moza.
Carmen Durán salientou que Galicia segue a avanzar dun xeito moi considerable na incorporación das tecnoloxías no eido sanitario. Así, puxo en valor a importancia que tiveron os cambios introducidos nas citacións de vacinación contra a covid-19. Un ámbito no que a sanidade pública galega pasou da citación pasiva a activa, e no que o emprego de Códigos QR facilitou o traballo do persoal de enfermería, así como as tarefas organizativas.
Do mesmo xeito, Saúde Pública valeuse das novas tecnoloxías para trocar o modelo de invitación aos cribados poboacionais dos cribados de cérvix e colon. Realizando na actualidade envíos dixitais a cadansúa poboación diana, e tendo previsto estender este modelo de invitación ao cribado do cancro de mamá, o vindeiro mes de setembro.
A Plataforma de Vixilancia Epidemiolóxica VIXIA (que agrupa a información relevante en canto a vixilancia dos servizos de microbioloxía clínica, medicina preventiva, centros socio-sanitarios e xefaturas territoriais); os sistemas de inspección de Saúde Pública, no que Galicia segue sendo pioneira, como o SEMAGA (sobre o control oficial en matadoiros), ou o HERME-MÓBIL (a ferramenta de inspección do sector alimentario e da sanidade ambiental), son outros dos avances que puxo de relevo Carmen Durán durante a súa comparecencia no Pazo do Hórreo.
Por último, destacou o desenvolvemento do Observatorio de Saúde Pública de Galicia, no que se realiza un investimento de máis de 700.000 euros, e que avala a aposta decidida de la Xunta de Galicia pola dixitalización, a comunicación coa cidadanía e a transparencia e que estará dispoñible a finais deste mesmo ano.
Así, o Observatorio é un instrumento que mediante información en Open Data, permite xerar, analizar, reunir, organizar e comunicar información relevante e de calidade no ámbito da saúde pública galega, co obxectivo de proporcionar información baseada na evidencia científica, e poñela ao dispor dos profesionais da saúde, investigadores, así como da sociedade en xeral.
A primeira fase do piloto do proxecto Xenoma Galicia permitiu detectar, entre os máis de 1.000 participantes aos que se lle recolleu unha mostra de sangue, 14 novos casos de alto risco para as patoloxías investigadas de cancro de mama e ovario hereditario, síndrome de Lynch e hipercolesterolemia familiar. A Consellería de Sanidade presentou esta mañá ante o Consello da Xunta un informe de situación do piloto do proxecto Xenoma Galicia. Cun investimento de 20 millóns de euros, o Goberno galego márcase o obxectivo de recompilar o ADN de 400.000 persoas. Pola porcentaxe de poboación incluída, Xenoma Galicia é un dos proxectos de maior envergadura do mundo. Permitirá ofrecer tratamentos farmacolóxicos individualizados, predicir o risco de enfermidades antes de apareceren para poder anticiparse a elas e evitalas grazas ao estudo do xenoma e da historia clínica.
No marco do Plan de Actuacións fronte aos posibles efectos das altas temperaturas sobre a saúde, a Xunta de Galicia vén de rebaixar a alerta por altas temperaturas aos niveis 1 e 2. Deste xeito, a vaga de calor iniciada pasado venres, que na xornada de onte acadou o nivel 3 de alerta en diversas áreas de Galicia, agora queda establecida nos dous primeiros niveis de alerta. En concreto, as zonas que ficarán no nivel 2 son o noroeste de Ourense, o interior de Pontevedra, así como o Centro e a Montaña da provincia de Lugo. Pola súa banda, defínese o nivel de alerta 1 por vaga e calor as zonas do interior de Coruña, o sur de Lugo, Miño de Ourense, montaña de Ourense, sur de Ourense, Valdeorras, litoral de Pontevedra e a zona Miño de Pontevedra.
