miércoles, 2 de julio de 2025
O Centro Tecnolóxico do Mar-Fundación Cetmar acollerá o vindeiro 21 de xuño na súa sede en Vigo o acto de presentación dos avances acadados polo proxecto CleanAtlantic de loita contra o lixo mariño no Espazo Atlántico. O centro, dependente da Consellería do Mar, é o coordinador desta acción europea que pecha con esta xornada sete anos de traballo colaborativo.
O evento permitirá dar a coñecer os datos e a información recollida durante todo este tempo sobre o lixo mariño, así como o seu seguimento, modelado e aplicación de todo este coñecemento de cara a súa eliminación. A cita concluirá cun debate sobre os retos e oportunidades a abordar no futuro neste ámbito a través de novos proxectos de colaboración innovadores e de actividades en rede que axuden a concienciar e cambiar a actitude dos actores implicados así como a mellorar os sistemas de xestión do lixo mariño.
A apertura da conferencia final, que se desenvolverá en formato presencial e online, está prevista para as 09,00 horas da mañá e a inscrición para asistir á mesma está aberta na páxina web do Cetmar, onde tamén é posible consultar a axenda do evento.
Proxecto CleanAtlantic
O consorcio CleanAtlantic, liderado polo Centro Tecnolóxico do Mar-Fundación Cetmar e composto por 19 organizacións de Irlanda, Reino Unido, Francia, Portugal e España, traballou desde 2017 na mellora do coñecemento e das capacidades de prevención, monitorización e eliminación do lixo mariño.
Esta iniciativa está financiada polo Programa de Cooperación Transnacional Espazo Atlántico e conta coa participación do Instituto Tecnolóxico para o Control do Medio Mariño (Intecmar) e da Universidade de Santiago de Compostela. O traballo realizado ao abeiro deste proxecto serviu para que fose un dos galardoados nos Atlantic Projects Awards xunto a outras accións investigadoras como Arcopol Platform e Mariner.
O presidente da Xunta, Alfonso Rueda, resaltou hoxe que Galicia asumirá desde mañá 'a plena xestión sobre o seu litoral', un 'feito histórico desde o punto de vista do autogoberno' que virá acompañado da posta en marcha de xeito inmediato de dous novos servizos, unha nova canle de información á cidadanía e a posibilidade de unificar nun só formulario calquera trámite ou solicitude sobre o litoral. Deste xeito, o Goberno autonómico prepárase para asumir o autogoberno pleno do litoral co traspaso efectivo a Galicia a partir de mañá das funcións, medios e servizos en materia de ordenación costeira.
A primeira fase do piloto do proxecto Xenoma Galicia permitiu detectar, entre os máis de 1.000 participantes aos que se lle recolleu unha mostra de sangue, 14 novos casos de alto risco para as patoloxías investigadas de cancro de mama e ovario hereditario, síndrome de Lynch e hipercolesterolemia familiar. A Consellería de Sanidade presentou esta mañá ante o Consello da Xunta un informe de situación do piloto do proxecto Xenoma Galicia. Cun investimento de 20 millóns de euros, o Goberno galego márcase o obxectivo de recompilar o ADN de 400.000 persoas. Pola porcentaxe de poboación incluída, Xenoma Galicia é un dos proxectos de maior envergadura do mundo. Permitirá ofrecer tratamentos farmacolóxicos individualizados, predicir o risco de enfermidades antes de apareceren para poder anticiparse a elas e evitalas grazas ao estudo do xenoma e da historia clínica.
