viernes, 9 de octubre de 2026
Telea, é a plataforma de telemonitorización do Servizo Galego para o seguimento dos pacientes no domicilio e emprega as tecnoloxías da comunicación para manter en contacto aos profesionais sanitarios e aos seus pacientes, facilitando a monitoraxe do estado de saúde dos pacientes, sen necesidade de desprazamentos ao seu centro de saúde. Este sistema de telemonitorización ten sido fundamental durante os últimos anos para o seguimento da pandemia da covid-19. O obxectivo é o empoderamento do paciente e a mellora da calidade de vida dos enfermos a través dun seguimento estreito encamiñado a detectar con axilidade descompensacións nos indicadores de saúde.
No ano 2021, Telea foi escollida como unha boa práctica en atención primaria pola Comisión Europea, no seo da convocatoria pública en que os países membros da Unión Europea presentaron distintas experiencias.
O modelo de telemonitorización do Servizo Galego de Saúde é unha das seis boas prácticas europeas seleccionadas para ser transferido aos países da Unión Europea mediante a participación na Joint Action CIRCE-JA. Esta acción conxunta ten como obxectivo a transferencia do coñecemento adquirido destas boas practicas en atención primaria, tras ter demostrado obter bos resultados. Nesta iniciativa, financiada polo programa EU4Health, están implicados 14 países europeos.
Deste xeito, a telemonitorización galega colócase como modelo de implementación no ámbito da telemedicina en atención primaria no conxunto da Unión Europea. Nunha primeira fase, será transferida a Suecia e Italia, para o que se organizarán reunións conxuntas e visitas de traballo durante os vindeiros 3 anos de duración desta Joint Action entre os tres países membros.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
