lunes, 10 de agosto de 2026
Deste xeito, Feijóo resaltou que un negocio ou establecemento que se beneficie do primeiro e do segundo Plan de rescate podería percibir un mínimo de 3.400 euros (sumando os 1.500 euros de axuda mínima do primeiro plan e os 1.900 do importe mínimo da segunda convocatoria) ata un máximo de 24.200 euros (8.500 máximo do primeiro plan e 15.700 do segundo).
Seguimos loitando contra a covid e seguimos apoiando tamén aos sectores económicos máis afectados pola pandemia, destacou, facendo fincapé en que estas axudas se conceden por establecemento, non por persoa afectada, o que permitirá que unha persoa con varios negocios poida acceder á cantidade correspondente en cada un deles.
O presidente da Xunta incidiu en que tamén se terán en conta as necesidades doutras actividades obrigadas a pechar como poden ser os ximnasios ou parques de ocio infantil. Así haberá catro liñas diferentes, todas compatibles entre si, dirixidas a persoas traballadoras autónomas, microempresas, hostalería e outras actividades pechadas desde xaneiro.
Máis polo miúdo, e dentro da primeira liña, Feijóo destacou un programa para axudar ás persoas traballadoras autónomas, ao que se destinarán 30 millóns de euros, con apoios de entre 1.200 e 3.000 euros.
O segundo programa dentro desta liña, dotado con outros 30 millóns, estará dirixido a microempresas e o apoio económico irá de 4.000 a 9.000 euros.
Feijóo tamén destacou a posta en marcha dun programa para a hostalería, do que poderán beneficiarse: autónomos, microempresas ou pemes do sector, que se vexan afectados polo peche conforme á normativa ditada polas autoridades sanitarias, podendo recibir desde 1.900 a 3.700 euros.
No tocante ao programa destinado a outras actividades pechadas, o presidente da Xunta aseverou que poderán acollerse a el os traballadores autónomos, microempresas ou pemes que desenvolvan unha actividade que se vexa afectada polo peche conforme á normativa ditada polas autoridades sanitarias. No caso desta liña, as axudas estarán entre 1.900 e 3.700 euros.
Ao longo da súa intervención, Feijóo insistiu en que todas estas liñas de apoios serán compatibles, ao respecto e como exemplo explicou que no caso dun establecemento de hostalería cunha caída de facturación de polo menos o 70% e cun número de empregados entre 21 e 25, podería percibir ata 15.700 euros.
O sistema de tramitación deste segundo plan será máis sinxelo que o primeiro, apuntou o presidente, lembrando que entre ambos os dous teranse mobilizados máis de 160 millóns de euros.
Tamén engadiu que aqueles concellos que queiran participar terán que notificar a contía que queiran achegar e desde a Xunta incrementaranse estas contías coas que os concellos ou deputacións consideren oportuno trasladar aos establecementos do seu ámbito territorial.
Por último, Feijóo avanzou que nas vindeiras semanas a Xunta reunirase co sector do comercio para definir, concretar e poñer en marcha iniciativas para incentivar o consumo no comercio de proximidade.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
