jueves, 25 de septiembre de 2025
A conselleira de Infraestruturas e Mobilidade, Ethel Vázquez Mourelle, e a directora de Augas de Galicia, Teresa Gutiérrez, presentaron en rolda de prensa a orde de axudas aos municipios, concrtando que, a partir deste martes, e ata o 24 de xullo, os municipios galegos poderán solicitar unha subvención de ata 15.000 euros para elaborar un plan de emerxencia fronte á seca. A convocatoria de axudas priorizará os concellos de menos de 50.000 habitantes e conta cun orzamento de 250.000 euros que se poderá ampliar en caso de que o volume de solicitudes exceda a partida dispoñible.
As axudas convócanse para os plans redactados neste ano e no vindeiro 2020, financiando a Xunta nun 80% de cada plan, e podendo achegar financiamento o resto das administracións públicas.
A conselleira remarcou que o apoio da Xunta aos concellos é tamén de asistencia técnica, tendo en conta as dificultades que pode implicar a elaboración dun documento desta magnitude, especialmente para os municipios pequenos, polo que na páxina web de Augas de Galicia se publica unha guía de plan municipal coa fin de servir de referencia para o traballos dos concellos.
Seguindo ese modelo, a elaboración dun plan de emerxencia permitirá que os concellos realicen unha primeira auditoría sobre o estado das redes de abastecemento para identificar as súas debilidades, localizar posibles fugas de auga, e determinar a súa situación ante episodios de seca.
Ethel Vázquez lembrou que a Lexislación estatal establece a obriga dos concellos de máis de 20.000 habitantes de contar con plans de emerxencia fronte á seca.
Colaboración de todas as Administracións
A conselleira incidiu en que a Xunta, unha vez máis, aposta por prestar apoio técnico e financeiro aos Concellos en materia de augas e defendeu a necesidade de que as distintas Administracións xunten esforzos e colaboren, cada unha no eido das súas competencias e responsabilidades.
Neste sentido, referiuse ás confederacións hidrográficas, organismos iguais a Augas de Galicia, e, especialmente, ás deputacións provinciais como corresponsables dos servizos nos concellos de menos de 20.000 habitantes.
A conselleira pediu unha maior implicación das deputacións provinciais na boa xestión da auga para apoiar aos pequenos concellos, como xa o está a facer dende a Xunta de Galicia con estas axudas.
Reiterou que os Concellos deben resolver os problemas actuais que teñen nas súas redes de abastecemento, para estar mellor preparados ante posibles situacións de diminución dos recursos hídricos dispoñibles, e aquí mencionou os estudos e análises que indican que existen perdas en rede de ata o 40%.
A conselleira destacou que garantir o subministro de auga é unha das prioridades de actuación da Xunta e avanzou que se reforzarán as respostas fronte á seca a través da Lei de medidas de garantías de abastecemento que prevé aprobar proximamente.
A conselleira de Política Social e Igualdade, Fabiola García, esixiu esta mañá ao Goberno central que ofreza 'explicacións convincentes' sobre os fallos detectados nas pulseiras antimaltrato e que 'tome solucións inmediatas'. Na súa intervención no Senado, solicitou que se dea a Galicia e ao resto de comunidades autónomas información sobre o alcance real destas incidencias. Fabiola García, que participou na sesión monográfica sobre violencia de xénero que tivo lugar hoxe no seo da Comisión Xeral das Comunidades Autónomas, indicou que a Xunta está recompilando información sobre os posibles casos acontecidos en Galicia e garantiu o apoio do Goberno galego a todas aquelas vítimas que se puideron ver afectadas.
A Cidade da Cultura apoia a creación contemporánea internacional ligada ao Camiño de Santiago coa estrea de Horizontes Errantes, un proxecto de danza e peregrinación artística da coreógrafa española Laura Aris e o bailarín alemán Jakob Jautz. A peza nútrese dos relatos da terra e dos seus habitantes, recollidos ao longo de 15 días de travesía entre Asturias e Santiago de Compostela seguindo o Camiño Primitivo. Así, durante desta semana, ambos os dous artistas estarán a traballar co músico portugués Jorge da Rocha no Gaiás, como parte do programa de residencias artísticas co que a Consellería de Cultura ofrece financiamento, espazos e recursos técnicos da Cidade da Cultura para facer realidade propostas de investigación e creación no ámbito da cultura contemporánea.
