jueves, 25 de abril de 2024
A responsable do Centro de Emprendemento Gaiás, Berta Álvarez-Buylla, e o director do WOS Festival, Iván Arias, inauguraron esta tarde no Auditorio Neira Vilas os encontros no Gaiás, cos que arranca esta edición do festival. Analizar e compartir novas formas de xestionar e facer cultura é o principal propósito destes faladoiros, cita obrigada, segundo afirmou Berta Álvarez-Buylla, para todas aquelas persoas que traballan no sector das industrias culturais.
A colaboración que a Cidade da Cultura mantén co WOS Festival desde hai tres últimos anos encádrase, precisamente, como parte da estratexia que está a desenvolver o Centro de Emprendemento para apoiar as iniciativas emprendedoras no ámbito da cultura.
Os WOS Encontros comezaron hoxe mércores cunha mesa redonda sobre a xeración de novas audiencias no ámbito cultural, coa participación de Encarna Lago, xerente da Rede Museística Provincial de Lugo, Álvaro Álvarez, da asociación Desconcerto Cultural, Ramón Souto, membro da orquestra de cámara Vertixe Sonora e promotor do festival Música e Arte: Correspondencias Sonoras, e Mónica Mura, artista interdisciplinar e comunicadora social que traballa na integración e visibilización de persoas e colectivos en especial mulleres en situación de risco ou vulnerabilidade.
Peter Kember, o explorador do son
O segundo encontro da xornada permitiu os asistentes achegarse á figura de Peter Kember, tamén coñecido como Sonic Boom, referente da música alternativa desde hai máis de 30 anos. Fundador, xunto a Jason Pierce, da influínte banda de space-rock Spaceman3, Kember falará dos seus múltiples proxectos en solitario ou en colaboración con artistas e bandas tan relevantes como Silver Apples, pioneiros da psicodelia electrócnica, Yo La Tengo ou Stereolab.
Na súa vertente máis experimental, o músico británico puxo en marcha o proxecto E.A.R., Experimental Audio Research, un colectivo aberto dedicado á improvisación e á exploración sonora empregando sintetizadores analóxicos, no que participaron artistas como Kevin Shields, de My Bloody Valentine ou Kevin Martin, do dúo Techno Animal.
Capaz de combinar a sensibilidade pop con innovacións sonoras que afondan no ritmo, o minimalismo e a repetición, o particular carácter explorador de Peter Kember ten influído, máis aló dos xéneros, en varias xeracións posteriores de músicos. Unha transcendencia que fai desta charla na Cidade da Cultura un acontecemento tan importante como o propio concerto que o músico británico dará ao día seguinte.
Innovación e sustentabilidade
Os WOS Encontros continúan o xoves día 13 no Gaiás con dúas mesas redondas nas que se falará de novos medios e narrativa de datos e tamén da aposta pola sustentabilidade na organización de festivais. Nesta última daranse a coñecer catro das iniciativas máis interesantes que se están a programar en España e Portugal. Emprazamentos inusuais, novas vías de financiamento e un firme compromiso coa sustentabilidade, a descentralización cultural e as novas tecnoloxías son as súas cartas de presentación.
O venres 14 e o sábado 15 os encontros do festival trasládanse ao Centro Galego de Arte Contemporánea, onde o debate se centrará en analizar o panorama da música electrónica en España e as políticas de xestión cultural.
A Cidade da Cultura reunirá estes días as persoas representantes dunha vintena de linguas minoritarias de Europa. Será durante a asemblea xeral e a conferencia anual da Network to Promote Linguistic Diversity (NPLD), unha organización de ámbito europeo cuxa finalidade é promover a diversidade lingüística na UE. Entre os seus membros figura, desde a súa creación, a Xunta de Galicia, que, a través da Consellería de Cultura actúa como anfitrioa nos eventos de 2024. Na xornada trataranse os asuntos que atinxen á administración da organización e presentaranse varios informes.
A Xunta vai solicitar de xeito inmediato ao Goberno central o traspaso dos medios materiais e persoais para xestionar a súa costa trala sentenza do Tribunal Constitucional que avala a Lei de ordenación e xestión integrada do litoral de Galicia. A conselleira de Medio Ambiente e Cambio Climático, Ángeles Vázquez, respondeu unha pregunta no pleno do Parlamento sobre esta materia na que salientou que o Alto Tribunal certifica que a norma galega é plenamente constitucional. Ademais, subliñou, confirma o que sempre defendeu a comunidade, que non é necesario reformar o Estatuto de Autonomía para que Galicia poida exercer plenamente as súas lexítimas competencias sobre o litoral.
