viernes, 17 de octubre de 2025
Uxía subirase este xoves ao escenario do Theâtre de Lorient para presentar o seu traballo Uxía-o, o seu persoal tributo á obra de Uxío Novoneyra. Farao acompañada por unha banda de luxo integrada por Quim Farinha (violín), Santi Cribeiro (acordeón), Isaac Palacín (percusión), Bluenn Le Friec (arpa), José Manuel Díaz (contrabaixo) e Sérgio Tannus (director musical).
Pola súa banda, Rodrigo Romaní actuará o sábado á noite na gran gala da arpa celta que terá lugar no Palacio de Congresos, onde esa mesma mañá ofrecerá unha master class. No seu concerto, interpretará os temas de Fíos de ouro no ar xunto a Beatriz Martínez (arpa) e Xulia Feixóo (percusión).
Axudas á actividades de distribución
A Agadic colabora na participación de ambos artistas galegos neste festival mediante a súa convocatoria de subvencións ás actividades de distribución para as industrias culturais, que este ano contou cunha dotación de 450.000 euros coa que deu resposta a 136 solicitudes para a realización de actuacións escénicas, concertos e accións promocionais da cultura galega en todo o mundo.
No caso do Festival de Lorient, a representación galega esténdese a case todos os escenarios, incluíndo o seu Gran Desfile das Nacións Celtas, no que o pasado domingo participaron a Banda de Gaitas Son da Chaira de Rábade-Begonte e o grupo de baile Saiñas de Xove.
Así mesmo, o 33 Trofeo Mac Crimmon de Gaita peninsular contou con catro solistas galegos: Xesús Rodríguez, Manuel Seoane, Diego Prieto e Raquel Vilas. Esta gaiteira de Teo acadou a puntuación máis alta xunto ao asturiano Javier Menéndez, quen obtivo o galardón por ser o de menor idade dos dous.
Hoxe mesmo, tocará no Quai de la Bregtane o gaiteiro de Moaña Anxo Lorenzo, mentres que Pepe Vaamonde foi o encargado de impartir unha master class de gaita o pasado sábado. Pola súa banda, o cuarteto Sementeira actuará dentro do programa de música sacra.
Con 48 anos de historia, o Festival Intercéltico de Lorient reúne en cada edición máis de 4.500 artistas de Bretaña, Escocia, Gales (país convidado este ano), Cornualles, Illa de Man e Irlanda, así como de Galicia e Asturias, ademais duns 120.000 espectadores con entrada e 750.000 visitantes na localidade.
O Roteiro dos Faros percorre o norte de Galicia e visita Cabo Ortegal, o miradoiro de Vixía Herbeira, o Santuario de Santo André de Teixido e o Cabo Estaca de Bares. Os participantes tamén poden coñecer Viveiro e os cantís de Loiba. Este itinerario do Roteiro dos Faros desenvólvese nos meses de xuño a setembro. En 2025, o programa de Trens Turísticos de Turismo de Galicia alcanzou se un 92,15% de ocupación nas prazas á venda. As rutas nas que practicamente esgotaron a totalidade das prazas foron as dos Queixos, Ribeira Sacra-Miño, Rías Baixas, Ribeira Sacra-Sil e Faros.
A cuarta edición do festival de maxia Galicia Ilusiona pecha esta fin de semana en Ferrol a súa programación anual de galas, que ampliou este ano o seu alcance, chegando a oito localidades galegas. A programación inclúe a presenza de artistas internacionais multipremiados que visitan Galicia por primeira vez, como Seimei, un mago manipulador coreano premiado coa variña de ouro de Monte Carlo; a Compañía Mag Edgard, premiada co premio FISM Turín 2025 a mellor espectáculo mundial; Nacho Samena, talento galego emerxente premio nacional de maxia 2024; David Burlet, artista carismático premio ao mellor malabarista francés durante 3 anos seguidos e o Mago Murphy, presentador e mestre de cerimonias con numerosos premios nacionais.
