viernes, 26 de abril de 2024
Os templos incluídos neste programa terán un amplo horario de visitas durante toda a semana cun único día de descanso e contarán con persoal para poder interpretar e explicar a historia, o valor e o significado destes lugares.
En Galicia gústanos compartir o noso patrimonio e a nosa identidade, pois consideramos que é o mellor xeito de preservalo e enriquecelo, salientou Nava Castro, quen subliñou que se beneficiarán deste programa non só os peregrinos, senón tamén os galegos en xeral e todos os turistas que desexen coñecer os recursos da Comunidade ata o outono.
No caso da Diocese de Lugo, abrirán ás súas portas igrexas e capelas do Camiño Francés, do Camiño Primitivo e da Vía da Prata. Trátase de espazos localizados tanto na provincia de Lugo como na de Coruña e Pontevedra, en concellos incluídos en dita diocese. A todos eles se engaden os templos da Arquidiocese de Santiago de Compostela no Camiño Francés, no Camiño Portugués e no Camiño Inglés, amais de na capital galega, meta da peregrinación.
Impacto cultural positivo
No acto desenvolvido en Melide, coa participación de diferentes autoridades relixiosas e civís, comentouse tamén o folleto editado para este programa, con información e horarios das igrexas participantes. Como lembrou a directora de Turismo, a Xunta vén de realizar un estudo coa Universidade de Santiago de Compostela para analizar o impacto da ruta en diferentes eidos, entre eles o cultural. Neste sentido, subliñou que unha das conclusións é que un dos aspectos máis valorados polos residentes dos concellos polos que discorre o Camiño de Santiago é a súa contribución á restauración e á mellora do patrimonio cultural e a oportunidade para coñecer outras culturas. Con este acordo de colaboración entre a Xunta e a Diocese de Lugo, estamos a reforzar esta percepción, declarou Nava Castro.
Nun 2018 no que se celebra o Ano Europeo do Patrimonio Cultural e o 25 aniversario da declaración do Camiño Francés como Patrimonio Mundial, afirmou que son contextos propicios para seguir traballando a prol do gran tesouro que gardan os itinerarios xacobeos.
Este programa será, como manifestou, unha oportunidade para persoas de todo o mundo, pois só no que vai de ano recolleron a súa Compostela, que acredita a culminación da ruta, máis de 138.000 persoas, o 61% estranxeiros de 160 países. O volume de camiñantes, que adoita ser maior na tempada estival, está a ser este ano un 9,5% superior que en 2017.
Templos participantes
No caso da Diocese de Lugo, abrangue as igrexas de Santa María de O Cebreiro, Santiago de Triacastela, o punto de información do Mosteiro de Samos, O Salvador de Sarria, San Nicolás de Portomarín, O Salvador de Vilar de Donas, San Tirso de Palas de Rei, San Xoán de Furelos, San Pedro de Melide, Santiago de Boente, Santa María de Fonsagrada, Santa María de Vilabade, a Catedral de Lugo, incluída na declaración de Patrimonio Mundial dos Camiños do Norte, Santiago de Taboada, en Silleda, e Santa María de Dozón.
Pola súa banda, na Arquidiocese de Santiago de Compostela inclúense os templos de A Peregrina en Pontevedra, a Capela de San Marcos no Parque Monte do Gozo, a Capela Xeral de Ánimas, San Bieito, Santa María do Camiño, San Andrés de Barciela, o Mosteiro das Beneditinas, a Colexiata de Iria Flavia, a Capela da Madalena, Capela de Francos, Santo Domingo de Betanzos, Santa María de Betanzos e Santiago de Betanzos.
O Plan director do Camiño de Santiago, co que a Xunta está a traballar desde 2015 cun orzamento de máis de 56 millóns de euros, conta con oito liñas estratéxicas, entre as que se inclúen accións de colaboración coas entidades eclesiásticas, a potenciación de todas as rutas de peregrinación e a preservación e potenciación dos seus valores patrimoniais.
A Cidade da Cultura reunirá estes días as persoas representantes dunha vintena de linguas minoritarias de Europa. Será durante a asemblea xeral e a conferencia anual da Network to Promote Linguistic Diversity (NPLD), unha organización de ámbito europeo cuxa finalidade é promover a diversidade lingüística na UE. Entre os seus membros figura, desde a súa creación, a Xunta de Galicia, que, a través da Consellería de Cultura actúa como anfitrioa nos eventos de 2024. Na xornada trataranse os asuntos que atinxen á administración da organización e presentaranse varios informes.
A Xunta vai solicitar de xeito inmediato ao Goberno central o traspaso dos medios materiais e persoais para xestionar a súa costa trala sentenza do Tribunal Constitucional que avala a Lei de ordenación e xestión integrada do litoral de Galicia. A conselleira de Medio Ambiente e Cambio Climático, Ángeles Vázquez, respondeu unha pregunta no pleno do Parlamento sobre esta materia na que salientou que o Alto Tribunal certifica que a norma galega é plenamente constitucional. Ademais, subliñou, confirma o que sempre defendeu a comunidade, que non é necesario reformar o Estatuto de Autonomía para que Galicia poida exercer plenamente as súas lexítimas competencias sobre o litoral.
