Notas de prensa

O conselleiro de Economía expón aos empresarios galegos en Cataluña o novo escenario para os investimentos en Galicia

A Xunta de Galicia quere alentar o impulso das iniciativas dos empresarios galegos no exterior nun momento no que o clima de confianza e as perspectivas cara ao futuro inmediato están solidamente asentadas na estratexia económica do Goberno e nos seus orzamentos. Así o expuxo o conselleiro de Economía, José Ramón Fernández Antonio, nun encontro que mantivo en Barcelona cos membros da Asociación de Empresarios Galegos en Cataluña (Aegaca). O conselleiro destacou o papel da asociación como marco de encontro e colaboración entre os empresarios, e tamén gabou o seu “ánimo de canalizar investimentos cara a Galicia”. Neste sentido, Fernández Antonio quixo explicar polo miúdo aos empresarios a nova orientación da política económica da Xunta de Galicia e o clima actual de “acentuación da confianza” que reflicten os indicadores e ao que ten contribuído “a estabilidade política, social, xurídica e económica” tras nove meses de novo Goberno.

Na súa intervención, o conselleiro lembrou o papel dos empresarios “como motor económico e fonte de creación de riqueza e emprego” polo que, segundo asegurou, “precisamos do seu protagonismo”. Por iso, transmitiu aos membros de Aegaca “o noso interese en coñecer de primeira man as opinións dos empresarios asentados fóra de Galicia”. Tras aludir ao encontro do pasado febreiro entre o Presidente da Xunta, Emilio Pérez Touriño, e os membros da Asociación, o conselleiro reiterou o apoio do Goberno galego á iniciativa de constitución dunha Alianza Galega de Emprendedores na que traballa Aegaca. Nesta liña, Fernández Antonio lembrou o “obxectivo da Xunta de impulsar de maneira decidida a proxección exterior dos nosos sectores produtivos e das nosas empresas”.

Impulso á innovación para converxer

A internacionalización é, precisamente, un dos puntais do novo modelo de crecemento tal e como explicou o conselleiro de Economía ante os empresarios galegos en Cataluña. Galicia, indicou, “enfróntase ao desafío da converxencia con España e Europa en termos de riqueza”, pero tamén noutros campos como o “da Sociedade da Información”. Por iso, engadiu, entre os obxectivos orzamentarios do novo Goberno, “un primeiro paso da estratexia de crecemento económico e o impulso da innovación e o incremento da produtividade”. Neste sentido, Fernández Antonio expuxo as prioridades recollidas nos Orzamentos para o 2006 onde, indicou, a Xunta quixo poñer a énfase“no aumento da competitividade económica e empresarial, na incorporación das novas tecnoloxías e a sociedade da información e na creación de emprego de calidade”.

Os plans de acción sobre os que traballa a Consellería de Economía para os próximos anos están fudamentados nos obxectivos orzamentarios de reforzo do sistema educativo e o capital humano; de mellora das infraestruturas físicas; e do crecemento baseado nunha aposta pola investigación e o desenvolvemento. Ademais, segundo expuxo Fernández Antonio, a Xunta de Galicia dará unha nova orientación á utilización dos fondos comunitarios no período 2007-2013 co obxectivo de que permitan a converxencia real da economía galega. O Marco Estratéxico de Galicia para dito período terá como liñas básicas a innovación e o coñecemento; o formación continua e o fomento do emprego; o desenvolvemento sostible e o medio ambiente; e o impulso da cohesión e a cooperación territorial. Todo iso, engadiu, coa finalidade de aumentar a competitividade e o atractivo de Galicia como lugar axeitado para impulsar proxectos empresariais.