domingo, 8 de noviembre de 2026
O Presidente da Mesa pola Normalización Lingüística, Carlos Callón, foi entrevistado polo xornalista Carlos Amado no programa Bos días da TVG. O representante da Mesa valorou que o galego é a lingua do Estado que máis precisa das garantías dun novo Estatuto e sinalou que esta entidade tentará permeabilizar a todas as forzas políticas para que a parte do Estatuto referida a lingua sirva para solucionar os problemas de discriminación lingüística e sexa aprobada por unanimidade. Nese sentido, Callón afirmou que non debería ser unha utopía tal unanimidade, posto que xa existiu na aprobación da Lei de Normalización Lingüística en 1983 e o galego ten que ser cousa de todas e todos. Se iso non fose así, as forzas políticas que non voten en favor deberán explicar por que non queren solucionar os problemas dos galegos e das galegas no referido á lingua.
O que desexamos é que o consenso que se produciu en 1983 coa Lei de Normalización Lingüística se reproduza agora no Estatuto de Autonomía; agora que non pode ser tumbado por ningún tribunal. Esta declaración fai referencia a que o deber de coñecer o galego foi retirado polo Tribunal Constitucional en 1986, xa que non aparecía no Estatuto de Autonomía en vigor, que é o lugar onde, segundo a Constitución, debe figurar (artigo 3.2: As demais linguas españolas tamén serán oficiais nas respectivas comunidades autónomas de acordo cos seus Estatutos).
O Presidente da Mesa tamén valorou a situación da Secretaría Xeral de Política Lingüística, seis meses despois de ser nomeada a súa titular. Segundo Callón, desde ese departamento da Xunta estase a desenvolver unha política pusilánime, séguense sen atacar os problemas de base que ten o noso idioma e sen desenvolver de verdade o Plan Xeral de Normalización Lingüística. Incidiu na idea de que vemos atónitos como esta semana se cumpren os seis meses do nomeamento da Secretaria Xeral e continúan sen se solucionar os problemas de base da lingua, como o referido ao ensino.
Tamén sinalou Callón que é un erro grave centrar o labor da Secretaría Xeral de Política Lingüística na promoción exterior: Vemos moitas viaxes a Bruxelas, París, Bos Aires, Casablanca... mais os problemas da lingua galega están aquí. Que se ensine galego en Honolulú ou na Conchinchina non vai solucionar que aquí unha parella que queira casar en galego non poida, que uns pais que queiran escolarizar aos seus fillos en galego aínda non poidan, etc. A Mesa desexa que esta política cambie polo ben do país.
Se Marisol López, seis meses despois de ser nomeada, non se encontra con capacidade suficiente (mesmo capacidade política, pois vese que hai un sector duro do PSOE que lle impide facer calquera mínima acción en defensa do galego), aí debería reflexionar sobre cal debe ser o seu papel nos próximos meses, ou mesmo se debe continuar ou non, concluíu o Presidente da Mesa.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
