viernes, 9 de enero de 2026
Por cuarto ano consecutivo, esta cita converte á Facultade de Ciencias Xurídicas e do Traballo en punto de referencia das relacións entres xuristas españois, portugueses e brasileiros. Así se destacou na inauguración do encontro, no salón de actos do centro, onde coincidiron a secretaria xeral da Universidade de Vigo, a tamén xurista María José Bravo Bosch; o decano da facultade, Francisco José Torres; a reitora da Universidade do Estado de Bahia, Adriana Marmori, e os directores do foro: os docentes da Universidade de Vigo, Juan Antonio Hernández Corchete e María Hylma Alcaraz Salgado, e o profesor da Universidade de Bahia Clodoaldo Silva da Anunciação.
Que é posible, que é lexítimo, que está prohibido?
Tal e como explicaron os responsables do encontro, as tecnoloxías emerxentes como a Intelixencia Artificial, o recoñecemento de emocións por parte de máquinas ou a automatización de decisións están a alterar a maneira na que as persoas interactúan entre si, traballan e se relacionan, e o Dereito non pode permanecer estático ante este novo escenario, moi polo contrario cumpre un rol central: dar forma, contido e límites ás novas situacións xurídicas que emerxen no espazo dixital.
Nesta liña defenderon que dicir que o Dereito conforma o espazo dixital implica entender que non só o regula, senón que contribúe activamente a definir que é posible, que é lexítimo e que está prohibido nesta nova contorna. Así como o mundo físico do Dereito estrutura as nosas relacións, a través de contratos, dereitos de propiedade, garantías constitucionais..., no mundo dixital tamén debe facelo, explica a docente María Hylma Alcaraz, insistindo na idea de que o Dereito non só debe adaptarse, senón tamén anticiparse.
Desde o punto de vista dos organizadores do encontro o Dereito debe brindar un marco normativo que permita que a innovación tecnolóxica conviva coa protección de Dereitos e principios fundamentais. Neste senso, o espazo dixital non é un territorio sen regras, senón un ámbito que require ser pensado e estruturado xuridicamente, para que a tecnoloxía se poña ao servizo das persoas e non ao revés, salienta Alcaraz.
40 relatorios divididos en 11 mesas de traballo
Nesta edición o foro acolle once mesas de traballo divididas en eixes temáticos -cuestións sociais, administración pública, corrupción, xénero, tributos...- . Serán en total 40 relatorios.
A sesión inaugural correu a cargo do catedrático de Dereito Constitucional da Universidade de Santiago de Compostela, José Julio Fernández Rodríguez, delegado de protección de datos da USC e director do Centro de Estudos de Seguridade, que afondou nos desaxustes entre a normativa de protección de datos e a IA; e de Carlos Eduardo da Silva Camillo, maxistrado do Tribunal de Xustiza de Bahia, que se meteu de cheo nos desafíos que supón a IA para o Dereito Internacional e os dereitos humanos.
A onda epidémica da gripe mantén unha intensidade baixa e tendencia decrecente na comunidade. Galicia segue a incrementar o número de vacinados fronte á gripe, con 876.347 persoas esta temporada, e cun especial incremento da cobertura vacinal dos maiores de 65 anos, cun 73,17 % de vacinados, o que supón dous puntos máis que o ano pasado. Tamén aumentou notablemente a porcentaxe de persoal sanitario vacinado, con máis do 66 %, o que representa 12 puntos con respecto a 2024. No colectivo de embarazadas, a cobertura aumentou case 2 puntos porcentuais, superando o 48 %. Con todo, o grupo de idade no que se atopa unha maior implicación segue a ser o de maiores de 80 anos, que supera as taxas de 2024 e este ano acada o 82,5 % de vacinados.
A Xunta de Galicia impulsa a calidade, a innovación e a proxección do Sistema universitario de Galicia a través do selo de excelencia, un distintivo do que gozarán neste novo ano unha vintena de titulacións. Para acadar esta cifra, a Consellería de Educación, Ciencia, Universidade e FP ten aberto neste momento dous procesos. Por unha banda, ata o 5 de febreiro as universidades poden solicitar o recoñecemento para un máximo de seis graos, dous por cada institución. Ademais, ata o 28 de febreiro está aberto o procedemento para renovación dos másteres. Este selo, creado polo Goberno autonómico, recoñece aquelas titulacións que destacan polo seu elevado nivel académico, científico e técnico, así como pola súa capacidade de adaptación ás demandas actuais da sociedade.
