martes, 1 de julio de 2025
O alcalde de Pontevedra, Miguel Anxo Fernández Lores, e a vicerreitora do campus de Pontevedra, Eva María Lantarón, participaron xunto con Cendón na inauguración dun evento que engloba un conxunto de relatorios dirixidos a afondar nese estado de ánimo da sociedade contemporánea desde as perspectivas da filosofía política, a ética, a ontoloxía, a memoria, a psiquiatría ou a antropoloxía. Baixo o título de Filosofía e nihilismo, esta programación pon o foco, como sinalou Lantarón, nun concepto que resoa profundamente na nosa sociedade, que se enfronta en ocasións ao desánimo caracterizado pola falta de valores e de horizonte. Ao longo desta semana, abordaranse estas inquedanzas, buscando ofrecer visións alternativas que axuden a confrontar e superar esta desesperanza, engadiu Lantarón, que incidiu en que para atopar solucións é fundamental definir os problemas aos que debemos enfrontarnos. Nesta mesma liña, Fernández Lores subliñou que, lonxe de ser unha reliquia académica, a filosofía é unha necesidade, hoxe máis que nunca, nun tempo no que todo semella moverse sen rumbo, as verdades son esquivas e os valores colectivos tremen.
A vicerreitora lembrou tamén que a colaboración entre a Universidade de Vigo e a Aula Castelao de Filosofía mantense desde 1996, o que reflicte o noso compromiso con achegar á filosofía á sociedade. Esta colaboración, salientou, vai máis aló dun evento con máis de 40 anos de traxectoria, posto que Vicerreitoría e Aula Castelao traballan tamén na organización dunha xornada de pensamento e creación que terá lugar no mes de outubro.
Alternativas para fuxir do nihilismo
Como lembrou Cendón, a Semana Galega de Filosofía é un congreso internacional de pensamento, que neste 2025 busca reunir diferentes alternativas para fuxir do nihilismo, a través das achegas tanto de filósofos e filósofas, como de académicos e profesionais de aámbitos como a psiquiatría, a antropoloxía ou as artes.
A programación desta XLI Semana Galega de Filosofía botou a andar este luns cunha conferencia do profesor da Universidade de Santiago de Compostela Luís García Soto, ao que toma ao relevo esta tarde o profesor de Filosofía da Universidade de Vigo Brais González Arribas, cun relatorio titulado Do entoar: unha ontoecoloxía relacional e nihilista. Esta primeira xornada pecharase cun relatorio da psiquiatra e investigadora Laura Martín López-Andrade, centrado na saúde mental.
A medicalización do malestar, a deriva reaccionaria diante da incerteza, a crise ecolóxica ou os tecno-imperialismos forman parte das cuestións a abordar ao longo desta semana, no marco dunha programación estruturada en tres bloques. Con cinco relatorios programados para as 10.30 horas, o bloque matinal reunirá diferentes académicos e académicas, mentres que o da tarde conecta, ás 17.00 horas, o eixe temático desta edición coa realidade de Galicia, pechándose cada xornada cunha conferencia ás 20.00 horas, de carácter máis divulgativo. Do mesmo xeito, co propósito de achegar as visións de xente de lonxe, que botase luz sobre o noso presente desde ópticas afastadas do eurocentrismo, salientou Cendón, este foro contará, entre outras, coas achegas do profesor da Universidad de Buenos Aires Nestor Kohan e da escritora mozambicana Paulina Chiziane, responsable de impartir o venres 25 a lección de clausura.
A primeira fase do piloto do proxecto Xenoma Galicia permitiu detectar, entre os máis de 1.000 participantes aos que se lle recolleu unha mostra de sangue, 14 novos casos de alto risco para as patoloxías investigadas de cancro de mama e ovario hereditario, síndrome de Lynch e hipercolesterolemia familiar. A Consellería de Sanidade presentou esta mañá ante o Consello da Xunta un informe de situación do piloto do proxecto Xenoma Galicia. Cun investimento de 20 millóns de euros, o Goberno galego márcase o obxectivo de recompilar o ADN de 400.000 persoas. Pola porcentaxe de poboación incluída, Xenoma Galicia é un dos proxectos de maior envergadura do mundo. Permitirá ofrecer tratamentos farmacolóxicos individualizados, predicir o risco de enfermidades antes de apareceren para poder anticiparse a elas e evitalas grazas ao estudo do xenoma e da historia clínica.
No marco do Plan de Actuacións fronte aos posibles efectos das altas temperaturas sobre a saúde, a Xunta de Galicia vén de rebaixar a alerta por altas temperaturas aos niveis 1 e 2. Deste xeito, a vaga de calor iniciada pasado venres, que na xornada de onte acadou o nivel 3 de alerta en diversas áreas de Galicia, agora queda establecida nos dous primeiros niveis de alerta. En concreto, as zonas que ficarán no nivel 2 son o noroeste de Ourense, o interior de Pontevedra, así como o Centro e a Montaña da provincia de Lugo. Pola súa banda, defínese o nivel de alerta 1 por vaga e calor as zonas do interior de Coruña, o sur de Lugo, Miño de Ourense, montaña de Ourense, sur de Ourense, Valdeorras, litoral de Pontevedra e a zona Miño de Pontevedra.
