Notas de prensa

Novos Cinemas levanta o pano con dez curtas nas que o alumnado 'hackea' a realidade

A oitava edición deste festival, que a Asociación Cultural Novos Cinemas e Matriuska Producións promove, coa participación do Concello de Pontevedra e a Universidade de Vigo celebra na noite deste martes a súa sesión inaugural, coa estrea en Galicia de � procura da estrela, de Carlos Martínez-Peñalver, mais, unhas horas antes, a súa programación bota a andar coa proxección dos resultados finais deste obradoiro promovido polo festival e a Vicerreitoría do campus.

Propostas que nacen do “xogo e risco”

“A experiencia do taller é moi enriquecedora. Dános a oportunidade de enfrontarnos á creación audiovisual a través duns preceptos complexos, pero que abren a porta a que xurdan situacións moi interesantes e valiosas”, sinala o graduado en Belas Artes �lex Viador, que deu forma a Tránsito, unha curta que presenta como unha “viaxe sensorial” nun taller no que as propostas de Molina levaron ao alumnado a “arriscarnos e cambiar a perspectiva”. Aberto tanto ao alumnado das diferentes titulacións do campus como a egresados e egresadas o pasado curso, a titorización deste artista audiovisual combínase no taller co traballo conxunto entre as e os participantes. “Todos compartimos os nosos puntos de vista, axudámonos entre nós”, engade nese senso a alumna de Belas Artes Alba Amoedo, que estrea El anhelo del reflejo, un “videopoema-ensaio” que reflexiona, a través da abstracción e do experimental, “sobre o concepto da realidade, a existencia, a conciencia de si...”, explica.

Partindo dunha revisión de traballos de cineastas, artistas e pensadores, Molina propuxo neste obradoiro, explica, a busca “do xogo e o risco”, que levou a que xurdisen propostas como GALA, unha “conversa ficticia” co seu ordenador da estudante de Comunicación Audiovisual Ana Laura Rodríguez, que destaca o interesante de propostas que “sempre son capaces de facerte pensar e ver máis aló”. Graduada en Belas Artes, Eva Iglesias suma a esta presentación Neky.ia, unha “curta experimental” na que a protagonista realiza “unha viaxe a través dalgúns dos recordos da súa irmá falecida” grazas a unha intelixencia artificial que permite “revivir momento do pasado”. Pola súa banda, Cristina Souto articulou a súa corta a partir dun xogo “co elemento do espello e co reflexo”, que traslada ao espazo público coa idea de reflexionar como mudan as identidades. Estudante de Belas Artes, esta participante destaca tamén o interese do taller para introducirse no “panorama contemporáneo da videoarte e a arte sonora”, mentres que a tamén alumna desta facultade Yasmina Farhani Luaces presenta en Novos Cinemas A terra ten glitch, “un diálogo entre as imaxes as casualidades e a terra”.

Xunto ás súas propostas, a presentación na que participaron a vicerreitora do campus, Eva María Lantarón; o director artístico do festival, Suso Novás e o responsable do taller incluía tamén as estrea das curtas realizadas polos estudante e egresados Julio Catalán, Fernando Areal, Ashling Ocampo e Ainana Barreiro.

Proxeccións, formación e encontros

Tras a sesión inaugural, na que participaron a directora de �rea do Campus de Especialización Crea, Ana Belén Fernández Souto; e o director de área adxunto á Vicerreitoría, Luis Torres, a oitava edición de Novos Cinemas esténdese ata o domingo 17. Xunto ás proxeccións, o programa abrangue diferentes talleres e encontros con profesionais, como os que protagonizarán o cineasta Victor Soho e o profesor da Escola Superior Artística do Porto Tiago Vieira na Casa das Campás, que será tamén sede do LAB, un programa de desenvolvemento de proxectos cinematográficos de cineastas noveis.