domingo, 8 de noviembre de 2026
Alí, nunha sesión aberta e gratuíta de arredor dunha hora de duración conducida pola responsable do proxecto a tamén poeta e xestora cultural Yolanda Castaño amosarán os seus versos Xiana Arias e Víctor Rodríguez Núñez.
Ela provén das terras montañesas da Fonsagrada, aínda que hoxe reside en Compostela. El vive e traballa como catedrático de universidade en Ohio pero, aínda que naceu e viviu por moitos anos en Cuba, sitúa os seus avós maternos na comarca de Ferrolterra, e os paternos na zona do Saviñao, nas Terras de Lemos.
Levando esas raíces galegas polo mundo, este poeta, xornalista, crítico, tradutor e doutor en Literaturas Hispánicas ten amosado a súa obra lírica en máis de corenta países. Autor de dezaseis premiados libros de poesía, publicáronse antoloxías da súa obra ata en dez países de lingua española, así coma en tradución a nove idiomas distintos. Ademais, o seu poemario 'despegue' acadou en España o prestixioso Premio Loewe. Pola súa banda, a poeta e xornalista cultural Xiana Arias Rego traballa na Radio Galega e fai parte da banda pop 'Atrás Tigre'. Deuse a coñecer en 2007 grazas ao Premio Xosé María Pérez Parallé por 'Ortigas', ao que dous anos máis tarde seguiu 'Acusación', colaborando tamén como poeta en obras colectivas, revistas, recitais e festivais galegos.
Unha libraría de proximidade poñerá á venda títulos dos poetas convidados, poñendo a disposición dos lectores e lectoras sinaturas nas súas copias. Esa oportunidade poñerá o ramo á ocasión de escoitar unha das autoras da nova poesía galega a carón dun dos poetas máis internacionais do actual ámbito hispánico. Contacto directo e na voz dos seus autores/as co mellor da nosa poesía así como da do panorama internacional.
Á cita con estes poetas seguirá á que teña lugar o próximo 17 de decembro xuntando a Antón Reixa co vasco Bernardo Atxaga. Será o último encontro do outono antes de que este ciclo mensual ininterrompido encete o novo ano.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
