300 euros

Dez euros ao dia é a cantidade que tres millóns de españoles teñen para afrontar a súa existencia. Na frase anterior resúmese a traxedia de moitísima xente que carece do máis necesario e son os sufridores máis directos dunha crise que non deixa de rebaixar dereitos, percepcións, nivel de vida.

A denuncia faina Cárita no seu informe anual, recentemente presentado, subliñando que hai seis anos a cifra dos que estaban nesa circunstancia tan especial era da metade.

Nestes últimos tempos, o deterioro foi imparable, e esta organización benéfica – Cáritas- pasou de atender 350.000 persoas no 2007 a case dous millóns (1,9 millóns) no pasado ano.

Dispoñer de trescentos euros ao mes para vivir é pertencer a escala máis humilde dunha sociedade que en tempos se creeu opulenta, e que hoxe ten completa conciencia da súa precariedade e mediocridade. Intentar vivir con trescentos euros ao mes é xogar a diario a unha tráxica ruleta rusa que pode provocar a morte por inanición.