Deputados

Chegados a este punto da historia, o panorama político preséntase escuro, brumoso, difícil de ver máis lonxe do que alcanza a actualidade de cada día. E os políticos levan consigo o lastre que lles foron incorporando os erros dos anos de democracia, os beneficios descomunais que os seus iguais se foron asignando, e a situación de privilexio que agora mesmo disfrutan a pesar de que todo ao arredor parece desmoronarse.

Que os deputados do Parlamento galego vaian cobrar uns trescentos euros menos ao mes polas maiores contribucións que van ter que efectuar á Facenda pública, non consegue aminorar a situación de crítica xeral xa que aínda que se mitiguen algunhas flagrantes desigualdades seguen a percibir os deputados emolumentos mensuais catro veces maiores que un traballador normal de calquera actividade laboral.

Certo que un representante público debe estar ben pagado porque o seu elevado papel así o esixe, pero coa que está caendo resulta que só determinadas prazas da administracións e os cargos políticos se libran da crise e son punto de referencia para a mellora do nivel de vida de calquera que queira dedicarse á actividade máis rendible.

É un paso no bo camiño a desaparición parcial de cantidades non suxeitas a retención. Pero aínda queda moito camiño por andar.